पुणे जिल्ह्यात ८६३ ‘पॉस’ मशिनचे वाटप

पुणे ः शासनाने एक नोव्हेंबरपासून अनुदानित खतांची विक्री ‘पॉस’ मशिनद्वारे करणे बंधनकारक केले आहे. शुक्रवार (ता.३)अखेर जिल्ह्यातील खत विक्रेत्यांना ८६३ ‘पॉस’ मशिनचे वाटप करण्यात आले आहे. तरीही जिल्ह्यात १३१ ‘पॉस’ मशिनचा तुटवडा आहे. त्यामुळे विक्रेत्यांना हे मशिन लवकर द्यावे, अशी मागणी होत आहे.  शुक्रवार (ता.३)अखेर पुणे जिल्ह्यमाध्ये ८६३ मान्यताप्राप्त परवानाधारक खत विक्रेत्यांना ‘पॉस’ मशिनचे वितरण करण्यात आले. त्याद्वारेच शेतकऱ्यांना अनुदानित खताची विक्री केली जाणार आहे. शेतकऱ्यांना खत खरेदीसाठी आधार कार्ड आवश्यक आहे. ‘पॉस’ मशिनसंदर्भातील अडचणी सोडविण्याकरिता मशिन पुरवठादार कंपन्यांना जिल्ह्यामध्ये प्रतिनिधी नेमण्याचे आदेश जिल्हा परिषदेचे कृषी विकास अधिकारी यांनी दिले.  सध्या ज्या खत विक्रेत्यांकडे ‘पॉस’ मशीन नाहीत त्यांना खत विक्री करता येणार नाही. कृषी विभागाद्वारे मशीनमध्ये खत विक्रीसाठी उपलब्ध साठा भरण्यात आला असून त्या विक्रीनुसार संबंधित कंपनीला सबसिडी मिळणार आहे. त्यामुळे अनुदानित खत हे फक्त ‘पॉस’ मशिनधारकांनाच पुरवठा होईल. ‘पॉस’ मशिनची एनआयसीला जोडणी करण्यात आली असून एका क्लिकद्वारे संपूर्ण माहिती संगणकावर उपलब्ध झाली असून त्याद्वारे खत विक्री केंद्र शासनाने सनियंत्रित केली आहे. कंपन्यांना विक्री आधारे अनुदान मिळणार आहे. मागणी करण्यात आलेल्या दुकानदाराचे mFMS वरील नोंदणी तपासण्यात येऊन कंपनीकडे पॉस मशीनचे पुरवठयाबाबत कार्यवाही करण्यात येत आहे.  तालुकानिहाय पुरवठा झालेल्या ‘पॉस’ मशिनची स्थिती  (कंसात: आवश्यक मशीन)  आंबेगाव ६७ (१५), बारामती ८९ (०), भोर ३० (८), दौंड ११७ (०), हवेली ७८ (०), इंदापूर ९५ (४८), जुन्नर १०७ (४२), खेड ६४ (०), मावळ १८ (०), मुळशी १५ (३), पुरंदर ५८ (७), शिरुर १२३ (५), वेल्हा २ (३), एकूण ८६३ (१३१)