सोलापुरातील ९४ हजार शेतकरी अद्यापही कर्जमाफीच्या प्रतीक्षेत

सोलापूर ः जिल्ह्यातील कर्जमाफीसाठी ऑनलाइन अर्ज भरलेल्या ९४ हजार ४६३ शेतकऱ्यांची माहिती अजूनही जुळत नाही. त्यामुळे या शेतकऱ्यांना प्रतीक्षाच वाट्याला आली आहे. जिल्हा प्रशासनाने आता या शेतकऱ्यांच्या अर्जांची नव्याने पडताळणी करण्याचे ठरवले आहे. त्या शेतकऱ्यांची यादी बॅंकांकडे दिली आहे; पण त्यासाठी या शेतकऱ्यांनी आपल्या बॅंकेशी त्वरित संपर्क साधण्याचे आवाहन जिल्हा उपनिबंधक अविनाश देशमुख यांनी केले आहे.  शेतकऱ्यांनी भरलेले अर्ज, बॅंकांकडील उपलब्ध माहिती जुळत नसल्याने कर्जमाफी योजना राबविण्यात अडचणी निर्माण होत आहेत. जिल्हा मध्यवर्ती बॅंक, राष्ट्रीयीकृत, खासगी, व्यापारी व ग्रामीण बॅंकांमधील ९४ हजार ४६४ शेतकऱ्यांची माहिती जुळली नाही. यादीमध्ये झालेल्या चुका सुधारण्यासाठी शेतकऱ्यांनी पाच फेब्रुवारीपर्यंत संबंधित बॅंकेत जाऊन यादीतील त्रुटी दूर करायच्या आहेत. जिल्हा बॅंकेकडील अर्जांच्या पडताळणीसाठी ६९ लेखापरीक्षकांची नियुक्ती केली आहे. शासनाने प्रसिद्ध केलेल्या १ ते ६६ कॉलममध्ये शेतकऱ्यांची माहिती भरून ती तालुकास्तरीय समितीकडे द्यायची आहे. समिती शहानिशा करून पुढील निर्णय घेणार आहे. जिल्हा बॅंकेचे खातेदार असलेल्या ५१ हजार ७७५ शेतकऱ्यांना कर्जमाफीपोटी २६५ कोटी २७ लाख रुपये मिळाले आहेत. तर राष्ट्रीयीकृत बॅंकांतील ३१ हजार ६०८ शेतकऱ्यांना १८६ कोटी २९ लाख रुपयांची कर्जमाफी मिळाली आहे. जिल्हा बॅंकेतून कर्ज घेतलेल्या दीड लाखापुढील थकबाकीदार शेतकऱ्यांची संख्या १५ हजार आहे.