अरणच्या विकासासाठी निधीची चिंता नको : ग्रामविकासमंत्री पंकजा मुंडे

सोलापूर : ‘‘अरणच्या विकासासाठी आतापर्यंत सुमारे एक कोटी ६५ लाख रुपयांचा निधी दिला आहे. आणखी काय हवे ते मागा, अरणच्या सर्वंकष विकासासाठी आपण कटिबद्ध आहोत, कृती आराखडा द्या, निधीची चिंताच करू नका,’’ असे ग्रामविकासमंत्री पंकजा मुंडे यांनी शुक्रवारी (ता. १३) अरण (ता. माढा) येथे सांगितले.  अरण (ता. माढा) येथे संत सावता माळी महाराजांच्या यात्रेनिमित्त आयोजित माळी समाज मेळाव्यात ग्रामविकासमंत्री मुंडे यांनी मार्गदर्शन केले. या वेळी व्यासपीठावर संयोजक कल्याणराव आखाडे, आमदार अतुल सावे, आमदार मनीषा चौधरी (मुंबई), नामदेव राऊत, शंकर वाघमारे, छगन म्हेत्रे, शंकरराव बोरकर, भास्करराव अंबेकर आदी उपस्थित होते.  श्रीमती मुंडे म्हणाल्या, ‘‘ब्रिटिशांनी दीडशे वर्षे राज्य केले. त्यांनी राजा-राजांमध्ये भांडणे लावली, ते गेले पण त्यांची वंशावळ देशात, राज्यात अजून आहे. ते माणसामाणसांत भिंती उभा करतात, हे आपण ओळखायला पाहिजे आणि समाजहितासाठी एकत्र यायला पाहिजे. समाजहिताचे निर्णय घेताना त्रास होतो, तो मलाही झाला. मला ज्यांनी त्रास दिला त्यांचे पाय धरून मी पाया पडले. ज्यांनी त्रास दिला त्यांची गळाभेट घेऊन मी अभिनंदन केले. विचारांची वज्रमूठ बांधली पाहिजे. वंचित, गरीब, पीडित अशा समूहाची ओळख तयार व्हायला पाहिजे.’’  सावता परिषदेचे संस्थापक-अध्यक्ष कल्याणराव आखाडे यांनी प्रास्ताविक केले. अरण व माळी समाजाच्या विकासाबाबत त्यांनी या वेळी विविध मागण्या केल्या. या वेळी आमदार सावे, आमदार चौधरी, नामदेव राऊत, शंकर वाघमारे, छगन म्हेत्रे, शंकरराव बोरकर, भास्करराव अंबेकर यांनी मार्गदर्शन केले. संघटना प्रवक्ते प्रा. राजीव काळे यांनी सूत्रसंचालन केले. संतोष राजगुरू यांनी आभार मानले.