‘आत्मा’ विभाग बनतोय असाह्य

कोल्हापूर : शासनाने कृषी तंत्रज्ञान व्यवस्थापन यंत्रणा (आत्मा)च्या ११ जिल्ह्याच्या प्रकल्प संचालकांच्या बदल्या कृषी विभागात केल्याने आत्माची स्वतंत्र यंत्रणाच खिळखिळी होण्याची शक्‍यता आहे. शासनाच्या या बदलीसत्रामुळे या विभागाचे भवितव्य अंधातरी बनले आहे. यामुळे या यंत्रणेने तयार केलेले शेतकरी गट, शेतकरी कंपन्या, शेतकरी मित्रांमध्ये तीव्र नाराजी व्यक्त करण्यात येत आहेत.  राज्य शासनाने नुकत्याच जिल्हा स्तरावर असणाऱ्या आत्मा प्रकल्प संचालकांच्या बदल्या प्राधान्याने कृषी विभागातील रिक्त स्थानावर केल्या आहेत. यामुळे आता प्रकल्प संचालकांची ही पदे रिक्त झाली आहेत. अनेक ठिकाणी हा कार्यभार जिल्हा अधीक्षक कृषी अधिकारी किंवा आत्मा विभागातील कनिष्ठ प्रकल्प उपसंचालकाकडे देण्यात आला आहे.  केंद्र व राज्य शासनाच्या संयुक्त विद्यमाने ६०:४० अशा पद्धतीने खर्चाचे नियोजन करण्यात आले. यानुसार आत्मा हा विभाग २०१० पासून स्वतंत्र समर्पित यंत्रणेद्वारे जिल्हाधिकारी यांच्या नियंत्रणात कार्यान्वित आहे. या माध्यमातून १ लाख १२ हजार शेतकरी गट राज्यात स्थापन करण्यात आले. प्रत्येक गटात सरासरी १५ ते २० शेतकरी आहेत. शेतकरी गटाद्वारे जवळपास सव्वा कोटी शेतकऱ्यांना आत्मा यंत्रणेने कृषी विभागाशी जोडले आहे. या शेतकऱ्यांना शेतकरी सहली, प्रशिक्षण, शेतकऱ्यांचे गट नोंदणी करणे, कृषी विद्यापीठ व कृषी संशोधन केंद्रे यांनी केले संशोधन या गटांपर्यंत पोचविण्यापर्यत काम ही यंत्रणा करते. राज्यामध्ये १५०० तालुका तंत्रज्ञान व्यवस्थापक सहायक तंत्रज्ञान व्यवस्थापक यांची पदे मंजूर असताना शासनाने गेल्या दोन वर्षांत त्यांची संख्या विविध कारणाने कमी करून ती साडेपाचशेवर आणली आहे. यामुळे ही यंत्रणा पंगू करण्याचे काम वरिष्ठ स्तरावरून सुरू असल्याचा आरोप होत आहे.