मराठवाड्यात २२५३ विहिरींचे अधिग्रहण

औरंगाबाद  : पाणीटंचाईची झळ बसणाऱ्या गाव वाड्यांच्या संख्येत भर पडली असली तरी गत आठवड्याच्या तुलनेत पाणीपुरवठ्यासाठीच्या विहीर अधिग्रहणात मात्र भर पडली नसल्याचे चित्र मराठवाड्यात पहायला मिळते आहे. टॅंकर व टॅंकरविरहित पाणीपुरवठ्यासाठी मराठवाड्यात आजवर २२५३ विहिरींचे अधिग्रहण करण्यात आले आहे.

मराठवाड्यातील ७८५ गावे व १७८ वाड्यांमधील १६ लाख १२ हजार ४३१ लोकांची तहान ९८६ टॅंकरद्वारे भागविली जात आहे. गत आठवड्यात टॅंकरवर अवलंबून असलेली लोकसंख्या १० लाख २३ हजार २५६ इतकी होती.  गत आठवड्याच्या तुलनेत टॅंकरवर अवलंबून असणाऱ्या लोकसंख्येत जवळपास १० हजार ८२५ ने घट झाली असली तरी टंचाईग्रस्त गावे, वाड्या व टॅंकरच्या संख्येत मात्र मराठवाड्यात किंचीत वाढ नोंदली गेली आहे. औरंगाबाद जिल्ह्यात सर्वाधिक पाणीटंचाईची झळ बसते आहे. या जिल्ह्यातील गंगापूर तालुक्‍यातील सर्वाधिक १०२ गावांत पाणीटंचाई भासत आहेत.

औरंगाबाद तालुक्‍यातील ९१ गावे, २७ वाड्या, फुलंब्री तालुक्‍यातील ६३ गावे ५ वाड्या, पैठण तालुक्‍यातील ४९ गावे ३ वाड्या, वैजापूर तालुक्‍यातील ७१ गावे ४ वाड्या, खुल्ताबाद तालुक्‍यातील ३२ गावे १४ वाड्या, कन्नड तालुक्‍यातील ३५ गावे ८ वाड्या, सिल्लोड तालुक्‍यातील ७२ गावे १३ वाड्या, सोयगाव तालुक्‍यातील ३ गावांना पाणीटंचाईला सामोरे जावे लागत आहे. जालना जिल्ह्यात १२८ गावे व १७ वाड्यांना टॅंकरद्वारे पाणीपुरवठा करावा लागत आहे.

हिंगोली जिल्ह्यातील १८ गावे व ४ वाड्यांना टॅंकरने पाणीपुरवठा केला जात आहे. परभणी जिल्ह्यातील २२ गावे व १३ वाड्यांना टॅंकरव्दारे पाणीपुरवठा केला जात आहे. नांदेड जिल्ह्यातील ७९ गावे व ६६ वाड्या आणि बीड जिल्ह्यातील १८ गावे व ४ वाड्यांना टॅंकरच्या पाण्यावर आपली तहान भागवावी लागत आहे. लातूर जिल्ह्यातील दोन गावांना टॅंकरच्या पाण्याशिवाय पर्याय नाही. उस्मानाबाद जिल्ह्यात ४५ अधिग्रहीत विहिरींच्या माध्यमातून टॅंकरव्यतिरिक्‍त पाणीपुरवठा सुरू आहे.

जिल्हानिहाय सुरू असलेल्या टॅंकरची संख्या