चुकीच्या व्यवहारावर आता कारवाई

औरंगाबाद : यापुढे वस्तू व सेवाकरसंदर्भात चुकीच्या व्यवहारावर कडक कारवाई केली जाणार असल्याची माहिती वस्तू व सेवाकर आयुक्‍त कार्यालयाच्या वतीने गुरुवारी (ता. २१) या पत्रकार परिषदेतून देण्यात आली.

या पत्रकार परिषदेला वस्तू व सेवाकर आयुक्‍त कार्यालयाचे अधीक्षक डी. आर. गुप्ता, जॉइंट कमिश्‍नर एस. बी. देशमुख व अशोक कुमार यांची उपस्थिती होती. १४ नोव्हेंबरच्या मध्यरात्रीपासून १७८ चॅप्टर हेडिंगखाली येत असलेल्या वस्तूवर जीएसटी दर २८ टक्‍क्‍यांवरून १८ टक्‍क्‍यांपर्यंत कमी करण्यात आला आहे.

आता केवळ ५० वस्तू आहेत ज्यांच्यावर २८ टक्‍के जीएसटी दर लावण्यात आला आहे. मोठ्या प्रमाणात वस्तूंचे जीएसटी दर १८ टक्‍क्‍यांवरून १२ टक्‍क्‍यांवर आणण्यात आले असून, काही वस्तूंना पूर्णपणे जीएसटीमुक्‍त करण्यात आले आहे. १० नोव्हेंबरला गुवाहाटीत झालेल्या जीएसटी परिषदेच्या २३ व्या सत्राच्या परिणामस्वरूप जीएसटीच्या प्रभावी दरामध्ये झालेल्या बदलाचे विवरण देण्यात आले आहे.

जीएसटीच्या नावावर अनियंत्रित किमती वाढू न देता ग्राहकांना फायदा पोचविणे यासाठी केंद्र सरकारने नॅशनल ऍँटी प्रॉिफटरिंग अथॉरिटीची स्थापना केली आहे. ही यंत्रणा किंमतीची तपासणी करून जीएसटीचे फायदे ग्राहकांपर्यंत पोहचतात की नाही याची सुनिश्चीती करते.

प्रत्येक राज्यामध्ये राज्यस्तरीय पडताळणी समित्यांची स्थापना करण्यात आली आहे. प्रभावित ग्राहक एका विशिष्ट नमुन्यात न्यायासाठी अर्ज दाखल करू शकतो. जीएसटीसंदर्भात सिनेमागृहातील अवकाशाच्या वेळात माहिती देत जागृती निर्माण केली जाणार असल्याचेही या वेळी सांगण्यात आले.

नोंदणीकृत व्यक्‍ती वस्तू किंवा सेवाच्या पुरवठ्यावरील कमी केलेल्या दराने किंवा इनपुट टॅक्‍स क्रेडिटचा लाभ ग्राहकास देत नसेल तर प्राधिकरणाला किमतीमध्ये कपात करणे, ग्राहकास व्याजासह किंमतीमध्ये कमी केल्याने मिळालेल्या रकमेएवढी रक्‍कम, अधिनियमानुसार नमूद केल्याप्रमाणे दंड लागू करणे आणि कायद्याच्या अंतर्गत नोंदणी रद्द करण्याचे आदेश देता येत असल्याचे पत्रकार परिषदेत स्पष्ट करण्यात आले.