‘बिंदू नामावली विलंबास जबाबदार असणाऱ्यांविरुद्ध कार्यवाही करा’

अकोला  ः कृषी सहायक संवर्गातील कर्मचारी पदोन्नतीपासून वंचित असल्याबाबत गुरुवारी (ता. २१) ‘ॲग्रोवन’मध्ये वृत्त प्रकाशित होताच कृषी अायुक्तालयाने तातडीने दखल घेत विभागीय सहसंचालकांना पत्र पाठवित अहवाल सादर करण्याबाबत कळविले अाहे. सन २०११ पासून कृषी सहायक व पर्यवेक्षक संवर्गाची जेष्ठता सूची/बिंदू नामावली प्रसिद्ध न करण्यास जबाबदार असलेल्या अधिकारी व कर्मचाऱ्यांविरुद्ध प्रशासकीय कार्यवाही करण्याचे प्रस्तावित करून तसा अहवालही मागविण्यात अाला अाहे. कृषी सहायक संवर्गातील कर्मचारी अमरावती विभागात पदोन्नतीपासून वंचित असल्याबाबत वृत्त प्रसिद्ध झाले. पदोन्नती मिळत नसल्याने कर्मचाऱ्यांमध्ये निराशा तयार झाली अाहे. पदोन्नतीची प्रक्रीया राबवण्यास दुर्लक्ष होत असल्याचा अारोप कनिष्ठ कर्मचारी सध्या करीत अाहेत. वृत्ताची दखल घेत कृषी अायुक्तालयाने पाठविलेल्या पत्रात म्हटले की, गट ‘क’ मधील कृषी पर्यवेक्षक संवर्गाची सेवा ज्येष्ठता सूची तत्काळ प्रसिद्ध करण्याबाबत २८ नोव्हेंबरच्या पत्रानुसार सूचित केले होते. तसेच अायुक्तालयात वेळोवेळी अायोजित बैठकीदरम्यान सूचना देऊनही या प्रकरणी कार्यवाही करण्यात अालेली नाही. ही बाब प्रशासकीयदृष्ट्या अतिशय गंभीर स्वरूपाची अाहे. अमरावती विभागात कृषी सहायक व पर्यवेक्षक संवर्गाची १ जानेवारी २०१७ ची अंतिम ज्येष्ठता सूची तत्काळ प्रसिद्ध करावी. पदोन्नतीस पात्र कृषी सहायकांना कृषी पर्यवेक्षक पदावर पदोन्नती देण्याबाबत नियमातील तरतुदी तपासून तत्काळ कार्यवाही करण्याचीही सूचना करण्यात अाली अाहे.  या संवर्गाच्या अद्ययावत बिंदू नामावलीवरून रिक्त पदाची स्थिती निर्धारीत करून तसेच सध्या कृषी पर्यवेक्षक पदावर तदर्थ स्वरूपात कार्यरत कर्मचाऱ्याचे नियमित पदावर समायोजन करून उर्वरित रिक्त पदावर पदोन्नतीस पात्र असलेल्यांना पदोन्नती द्यावी. ३० जून २०११ च्या पदोन्नती समितीचे इतिवृत्त उपलब्ध नसल्याची बाब समोर अाली असून दप्तरी अाहे किंवा नाही याची खातरजमा करण्याचेही कळविण्यात अाले. इतिवृत्त उपलब्ध नसल्यास समिती  गठीत करून अभिलेखाची पडताळणी करावी व समितीच्या अहवालानुसार अभिप्रायासह प्रशासकीय कार्यवाही करण्याबाबतही निर्देश देण्यात अाले अाहेत.