दुष्काळ जाहीर करण्यासाठी जळगावात प्रशासकीय समिती

जळगाव : जिल्ह्यात दुष्काळाचे नेमके अहवाल, माहिती समोर येण्यासाठी प्रशासनाकडून कार्यवाही हाती घेण्यात आली आहे. जिल्ह्यातील १२ तालुके दुष्काळी स्थितीत प्रथमदर्शनी दिसत असून, यासंदर्भात अंतिम कार्यवाहीसाठी जिल्ह्यात प्रशासनाने समिती गठीत केली आहे.

मुख्यमंत्री देवेंद्र फडणवीस यांनी दुष्काळ जाहीर करण्यासंबंधी याच महिन्यात अखेरीस कार्यवाही पूर्ण होईल, असे सांगितले. या पार्श्‍वभूमीवर प्रशासनाची धावपळ सुरू आहे. जिल्ह्यात धरणगाव, पारोळा व एरंडोल वगळता इतर सर्व तालुक्‍यांमध्ये दुष्काळी स्थिती असल्याचे प्रथमदर्शनी समोर आले आहे. तीन तालुके वगळता इतर सर्व तालुक्‍यांमध्ये ७५ टक्‍क्‍यांपेक्षा कमी पाऊस पडला आहे. १२ तालुक्‍यांमधील आणेवारी ५० पैशांपेक्षा कमी जाहीर करण्याची मागणीही यानिमित्ताने झाली आहे. परंतु या महिन्यातील आणेवारी दुष्काळासंबंधी महत्त्वाची असून, पीक कापणी अहवाल, भूगर्भातील पाण्याची स्थिती व इतर बाबी लक्षात घेऊन दुष्काळाची घोषणा होणार आहे. त्यासाठी जिल्हा प्रशासनाची समिती कार्यरत झाली आहे. जिल्हाधिकारी किशोर राजे निंबाळकर हे या समितीचे अध्यक्ष आहेत.

ही समिती प्रत्येक तालुक्‍यात किमान पाच ठिकाणी पाहणी करणार आहे. त्यात पीकस्थिती, पाण्याची उपलब्धता, चारा आदींची माहिती घेतली जाईल. महसूल, कृषी विभागातील अधिकारी बांधावर जाऊन पाहणी करेल. ही पाहणीदेखील जिल्हा समितीला मार्गदर्शक ठरणार आहे.

या समितीमध्ये भूजल सर्वेक्षण यंत्रणा, कृषी विभाग, जलसंपदा विभाग, जिल्हा परिषदेचे वरिष्ठ अधिकारी, जिल्हा प्रशासनातील निवासी उपजिल्हाधिकारी यांचा समावेश आहे. दुष्काळ जाहीर करण्यासारखी स्थिती नसलेल्या तालुक्‍यांमध्ये या महिन्यात काही बदल झालेले दिसले. दुष्काळी स्थितीत संबंधित तालुके आल्याचे स्पष्ट झाले, तर संबंधित तालुकेही दुष्काळाच्या छायेत आणून त्या तालुक्‍यांमध्ये उपाययोजना जाहीर केल्या जातील, अशी माहिती मिळाली.