मोजक्‍याच उत्पादकांना वधारलेल्या दराचा लाभ

औरंगाबाद : मराठवाड्यातील मोसंबी उत्पादकांसमोर यंदा दरासाेबतच पोषक नसलेल्या स्थितीमुळे संकटांची मालिका कायम आहे. मोसंबीचा आंबे बहार अंतिम टप्प्याकडे वाटचाल करत असताना जवळपास पंधरवड्यापासून वधारलेल्या दराचा लाभ बाग देणे बाकी असलेल्या पाच ते दहा टक्‍केच मोसंबी उत्पादकांना मिळतो आहे.

मराठवाड्यातील मोसंबीला जीआयचे मानांकन मिळाल्याने मोसंबीची गोडी वाढली आहे. जवळपास ४८ हजार हेक्‍टरवर मोसंबीचे क्षेत्र विस्तारले असून, त्यामध्ये सर्वाधिक क्षेत्र जालना व औरंगाबाद जिल्ह्यात आहे.

यंदा मोसंबी बागायतदारांना नोटाबंदीचा सर्वाधिक फटका बसला. त्यामुळे शेतकऱ्यांना टनामागे दहा ते पंधरा हजार रुपये कमी दराने मोसंबीची बाग द्यावी लागली. जवळपास दिवाळीपर्यंत मोसंबीतील दर बारा ते अठरा हजार रुपये प्रतिटनापुढे गेले नसल्याचे उत्पादक शेतकऱ्यांनी सांगितले.

दिवाळीनंतर मात्र जसजशी मालाची कमतरता जाणवू लागली तसतसा मोसंबीचा बाजार वधारत गेला. आजघडीला २५ ते ३० हजार रुपये प्रतिटन, तर काही भागात ३० हजार रुपये प्रतिटनापुढेही मोसंबीला दर मिळत असल्याची माहिती शेतकऱ्यांनी दिली. अर्थात आंबे बहार अंतिम टप्प्यात असल्याने पाच ते दहा टक्‍क्‍यांपुढे उत्पादक माल विक्रीचे राहिले नाही. केवळ कांड्यावर मोजण्याइतक्‍याच शेतकऱ्यांना वधारलेल्या दराचा फायदा मिळत असल्याचे मोसंबी बाजाराच्या जाणकारांनी सांगितले.

अशा आल्या अडचणी - बहाराचे व्यवस्थापन करताना पावसाच्या खंडाचा सामना करावा लागला - बुरशी वाढण्यासोबतच देठकुजमुळे फळगळीचाही फटका बसला - डासांचा प्रादुर्भाव काही भागात २५ ते ३० टक्‍क्यांहून अधिक - काही ठिकाणी फळमाशीचाही शिरकाव - गळीचे प्रमाण २५ ते ५० टक्‍क्‍यांपर्यंत  

मोसंबीची पाचशे झाडे आहेत. दरवर्षी ३० ते ३५ टन माल निघतो. यंदा मात्र ३ ते ४ टन माल गळाला. चार दिवसांपूर्वी २९,५०० रुपये प्रतिटनाप्रमाणे बाग दिली. बागेत २० टन माल निघाला. - सोमनाथ तळतकर, मोसंबी उत्पादक घुंगर्डे, हदगाव जि. जालना.

माझ्याकडे तीन एकर शेतीत मोसंबीची साडेचारशे झाडे आहेत. यंदा फळगळ मोठ्या प्रमाणात झाली. अर्धी फळे गळून पडली. त्यामुळे बागेत उत्पादनाचा अंदाज येईना. दोन दिवसांपूर्वी टनाने सौदा झाला. ३५ हजार रुपये प्रतिटनाने मोसंबी दिलीय. - विष्णू बोडखे, मोसंबी उत्पादक मुधलवाडी, ता. पैठण,

जि. औरंगाबाद.