पंधरवड्याच्या विश्रांतीनंतर सोलापुरात पावसाची हजेरी

सोलापूर  : मृग नक्षत्रात झालेल्या पावसानंतर पंधरवड्याच्या दहा दिवस विश्रांती घेऊन सोलापूर जिल्ह्यात शुक्रवारी (ता. २२) पावसाने दमदार पुनरागमन केले. सायंकाळी सहाच्या सुमारास सुरू झालेला पाऊस रात्री बारावाजेपर्यंत थांबून थांबून बरसत होता. या सहा तासाच्या कालावधीत हवामान विभागाकडे ४९ मिलिमीटर इतक्‍या पावसाची नोंद झाली. मोहोळ, पंढरपूर, उत्तर सोलापूर, दक्षिण सोलापूर, करमाळ्यात पावसाचा सर्वाधिक जोर राहिला.

शुक्रवारी दिवसभर कडाक्‍याचे ऊन होते, उकाडाही प्रचंड जाणवत होता. सायंकाळी पाचच्या सुमारास काहीसे ढगाळ वातावरण झाले. सहाच्या सुमारास पावसाला सुरुवात झाली. मेअखेर व जूनच्या सुरवातीस झालेल्या मुसळधार पावसानंतर वरुणराजाने तब्बल दोन आठवडे विश्रांती घेतली. गेल्या दोन दिवसांपासून शहर व परिसराच्या वातावरणात बदल झाला होता. मृग नक्षत्रात झालेल्या पावसावर काही ठिकाणी पेरण्या झाल्या आहेत, तर काही ठिकाणी पावसाची वाट बघत असल्याने खोळंबलेल्या खरिपाच्या पेरण्या या पावसामुळे मार्गी लागतील. अगदी सुरुवातीला सायंकाळी साडेसहा वाजता हलका असणारा पाऊस, हळू-हळू वाढत गेला. रात्री नऊपर्यंत पावसाचा जोर मोठा राहिला. त्यानंतर पुन्हा त्याचा वेग कमी झाला. रात्री बारावाजेपर्यंत पावसाची रिपरिप थांबून-थांबून सुरुच होती.

जिल्ह्यातील करमाळा, पंढरपूर, मोहोळ, उत्तर सोलापूर, दक्षिण सोलापूर या तालुक्‍यात पावसाचा सर्वाधिक जोर राहिला. सायंकाळी सहा ते रात्री बारा या कालावधीत हवामान विभागाकडे ४९ मिलिमीटर इतक्‍या पावसाची नोंद झाली आहे. दुसऱ्या दिवशीही शनिवारी (ता.२३) पुन्हा दिवसभर कधी ढगाळ, कधी ऊन असे वातावरण राहिले.