कर्जमाफी, पीककर्जप्रश्नी बुलडाण्यात काँग्रेसचा आसूड मोर्चा

बुलडाणा  : शेतकरी कर्जमाफी व पीककर्जाच्या मुद्द्यावरून शासनाला जागे करण्यासाठी शनिवारी (ता. ३०) काँग्रेसने जिल्हाधिकारी कार्यालयावर अासूड मोर्चा काढला. अखिल भारतीय काँग्रेसचे नेते मुकुल वासनिक यांच्या नेतृत्वात हजारो कार्यकर्ते या मोर्चात सहभागी झाले होते.

शेतकऱ्यांना पीककर्ज मिळावे, संपूर्ण कर्जमाफी व्हावी यासह इतर मागण्यांसाठी काँग्रेसच्या वतीने मोर्चा अायोजित करण्यात अाला होता. जिल्हाध्यक्ष अामदार राहुल बोंद्रे, अखिल भारतीय काँग्रेस कमिटीचे सचिव अामदार हर्षवर्धन सपकाळ, गणेशराव पाटील, श्याम उमाळकर यांच्यासह प्रमुख नेते या वेळी उपस्थित होते.

राज्य शासनाची कर्जमाफी ही ऐतिहासिक फसवी योजना अाहे. शेतकऱ्यांच्या सन्मानाऐवजी अपमान करणारी ही योजना असल्याचा आरोप या वेळी करण्यात अाला. बुलडाणा शहरातील जिजामाता प्रेक्षागार मैदानावरून मुकुल वासनिक यांच्या उपस्थितीत मोर्चा निघाला. संगम चौक, जयस्तंभ चौक, आठवडी बाजार मार्गे हा मोर्चा जिल्हाधिकारी कार्यालयावर धडकला. या ठिकाणी श्री. वासनिक यांनी केंद्र व राज्यातील सरकारवर घणाघाती टीका केली. दिलेले कुठलेही अाश्वासन पूर्ण झालेले नसून यांच्या कारभाराला जनता कंटाळल्याचे ते म्हणाले. 

या मोर्चामध्ये काँग्रेसचे नेते व शेतकरी बैलगाड्यांसह सहभागी झाले होते. कार्यकर्त्यांच्या हातात ‘नुसत्याच घोषणा, घोषणांचे गाजर, कर्जमाफी द्या...कुठे आडवे गेले मांजर’, ‘थकलो अाम्ही करून करून अर्जावर अर्ज...मुख्यमंत्रीसाहेब सांगा ना कधी मिळणार पीककर्ज’ अशी उपहासात्मक टीका करणाऱ्या घोषणांचे फलक झळकत होते. मोर्चासाठी जिल्हाभरातून काँग्रेस कार्यकर्ते व शेतकरी हजारोंच्या संख्येत उपस्थित होते.