वीज दरवाढ रद्दबाबतचे परिपत्रक महिनाअखेरपर्यंत काढणार : पालकमंत्री चंद्रकांत पाटील

वीज दरवाढीविरोधात आंदोलन
वीज दरवाढीविरोधात आंदोलन

शिरोली पुलाची, जि. कोल्हापूर : वीज दरवाढ रद्दबाबतचे शासन परिपत्रक ३१ जानेवारीपर्यंत काढणार असल्याचे आश्वासन पालकमंत्री चंद्रकांत पाटील यांनी दिल्यानंतर येथील महामार्ग रोको आंदोलन सोमवारी (ता.२१) मागे घेण्यात आले. 

अवाजवी वीज दरवाढ रद्द करावी, शेती पंपांच्या वीजबिलातील पोकळ थकबाकी रद्द करावी, या प्रमुख मागण्यांसाठी महाराष्ट्र राज्य इरिगेशन फेडरेशन व सर्व पक्षीयांतर्फे पंचगंगा पुलावर सोमवारी पुणे - बंगळूर महामार्ग रोको आंदोलन सुरू करण्यात आले होते. शासनाकडून वीज दरवाढ रद्दबाबतचे पत्र मिळाल्याशिवाय आंदोलन मागे घेणार नाही, असा इशारा सर्वपक्षीय नेत्यांनी दिला होता. या वेळी पालकमंत्री चंद्रकांत पाटील यांनी आंदोलन स्थळी भेट देत वीज दरवाढ रद्दबाबत परिपत्रक काढण्याचे आश्वासन दिले. त्यामुळे फेडरेशनचे अध्यक्ष डॉ. एन. डी. पाटील यांच्या नेतृत्वाखाली सुरू असलेले हे आंदोलन मागे घेण्यात आले.

सर्व कृषिपंप धारकांचे मीटर रीडिंग न घेता सरासरी जादा दिलेल्या बिलांच्या योग्य दुरुस्त्या कराव्यात, दुरुस्त केलेली वीज बिले भरण्यासाठी कृषी संजीवनी योजना जाहीर करावी, कृषी पंपधारकांसाठी नवीन वीज दर सवलतीने ठरवावेत, शासकीय पाणीपट्टीचे दर सवलतीचे ठरवावेत, औद्योगिक वीज दरवाढ रद्द करण्यासाठी सरकारने ३४०० कोटी रुपयांचे अनुदान द्यावे, घरगुती वीज दरवाढ रद्द करावी, कृषी पंपधारक शेतकऱ्यांसाठी रात्रीऐवजी दिवसा १२ तास वीजपुरवठा करावा, गुऱ्हाळघरांना सवलतीच्या दरात वीजपुरवठा करावा आदी मागण्यांसाठी हे आंदोलन पुकारण्यात आले होते.  

खासदार राजू शेट्टी, आमदार सतेज पाटील, हसन मुश्रीफ, डॉ. सुजीत मिणचेकर, सत्यजीत पाटील, उल्हास पाटील, प्रकाश आबिटकर, अरुण लाड, खासदार धनंजय महाडिक, भगवान काटे, बाबासाहेब पाटील-भुयेकर, आर. जी. तांबे, रणजित जाधव, राजारामबापू साखर कारखान्याचे अध्यक्ष पी. आर. पाटील, क्रांती कारखान्याचे अध्यक्ष अरुण लाड, माजी आमदार संजयबाबा घाटगे आंदोलनात सहभागी झाले होते. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com