कृषी आयुक्तांच्या कार्यालयासमोर शेतकऱ्याचा आत्मदहनाचा प्रयत्न

राष्ट्रीय अन्नसुरक्षा अभियानात झालेल्या घोटाळ्याप्रकरणी प्राथमिक चौकशी अहवाल चौकशी समितीने सादर केला आहे. त्यावर लेखापरीक्षण करून संबंधित अधिकाऱ्यावर कारवाई करण्याच्या सूचना कृषी आयुक्तांनी दिल्या आहेत. - दिलीप झेंडे, विभागीय कृषी सहसंचालक, पुणे विभाग.
शेतकऱ्याचा आत्मदहनाचा प्रयत्न
शेतकऱ्याचा आत्मदहनाचा प्रयत्न

पुणे  ः नेवासा तालुक्यातील पुनतगाव (जि. नगर) येथील शेतकरी दीपक धनगे यांनी शुक्रवारी (ता. ५) दुपारी बारा वाजता कृषी आयुक्त सच्चिंद्रप्रताप सिंह यांच्या कार्यालयासमोर आत्मदहन करण्याचा प्रयत्न केला. नेवासा तालुक्यातील अन्न सुरक्षा अभियानातील भ्रष्टाचारप्रकरणी तालुका कृषी अधिकारी सुधीर शिंदे यांच्यावर कारवाई होत नसल्याचा निषेध म्हणून त्यानी अंगावर रॉकेल ओतून पेटवून घेण्याचा प्रयत्न केला. कृषी आयुक्तालयातील अधिकारी, कर्मचाऱ्यांनी वेळीच आग विझवल्यामुळे पुढील अनर्थ टळला.

यासंदर्भात श्री. धनगे म्हणाले, की ``कृषी विभागातील राष्ट्रीय अन्न सुरक्षा योजनेत झालेल्या भ्रष्टाचारासंबंधीची तक्रार कृषी खात्यातील वरिष्ठ अधिकारी तसेच मुख्यमंत्री देवेंद्र फडणवीस यांच्याकडे मी केली होती. या प्रकरणी चौकशी अधिकारी नेमून १९ महिन्यांचा कालावधी होऊनही नेवासा तालुका कृषी अधिकाऱ्यांवर कारवाई झाली नाही. संबंधितांवर कारवाई झाली नाही, तर आत्मदहन करेन, असा इशारा देऊनही प्रशासनाने दुर्लक्ष केले. कारवाईसंदर्भात लेखी पत्र मिळत नाही, तोपर्यंत आयुक्तालयातून हलणार नाही.``

नेवासा तालुका कृषी अधिकारी यांनी २०१५-१६ या वर्षात राष्ट्रीय अन्न सुरक्षा अभियानाअंतर्गत शेतकऱ्यांनी बी-बियाणे, खते, किटकनाशके यांचे केवळ कागदोपत्री वाटप केल्याचा आरोप आहे. तसेच लाभार्थी शेतकऱ्याच्या खोट्या सह्या, खोटे अंगठे, खोट्या शेतीशाळा, अस्तित्वात नसलेल्या दुकानांतील बिले जोडून लाखो रुपयांचा भ्रष्टाचार करण्यात आल्याचे तक्रारदाराचे म्हणणे आहे  दोषींवर निलंबनाची कारवाई करून अपहाराची रक्कम वसूल करावी, त्यांच्यावर फौजदारी गुन्हा दाखल करावा, चौकशी अधिकाऱ्यावर शिस्तभंगाची कारवाई करावी, अशी धनगे यांची मागणी आहे.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com