नगर जिल्ह्यात तीन ठिकाणी शेतकऱ्यांचे आंदोलन

नगर : सरकारला शेतकरी दुश्‍मन वाटत आहेत. त्यानुसारच सरकार शेतकऱ्यांना वागणूक देऊन हेळसांड करत आहे, असा आरोप करीत शुक्रवारी (ता. १) शेतकऱ्यांनी जिल्हाधिकारी कार्यालयासमोर भाकड जनावरे आणून आंदोलन केले. सरकारने दुधाला २७ रुपये दर द्यावा, अशी आंदोलनकर्त्यांनी जिल्हाधिकाऱ्यांकडे मागणी केली. गतवर्षी शेतकरी संपाचे मुख्य केंद्र असलेल्या पुणतांबे (ता. राहाता) येथे शेतकरी आणि ग्रामस्थांनी सरकारचे वर्षश्राद्ध घातले व उपस्थितांना गाजरे वाटली. अकोल्यात किसान सभेतर्फे मोर्चा काढण्यात आला. 

शेतीमाल, दुधाला दर मिळण्यासह अन्य मागण्यासाठी  शुक्रवार पासून (ता. १) राज्यात शेतकरी संपाला सुरवात झाली. त्याचाच एक भाग म्हणून नगर जिल्ह्यात आंदोलन सुरू झाले आहे. गेल्या वर्षी झालेल्या शेतकरी संपाचे मुख्य केंद्र पुणतांबा (ता. राहाता) हे होते. शुक्रवारी संपाला एक वर्ष पूर्ण झाले आहे. मात्र तरीही सरकारने शेतक-यांचे प्रश्न सोडवले नाहीत. याचा निषेध म्हणून शुक्रवारी पुणतांब्यातील शेतकऱ्यांनी ग्रामपंचायत कार्यालयासमोर एकत्र येऊन सरकारचे वर्षश्राद्ध घातले. त्या ठिकाणी काळ्या गुढ्या उभारल्या.

गेल्या वर्षी राज्यभरातील शेतकरी संपात सहभागी झाले, मात्र सरकारने खोटी अश्वासने देऊन संप मोडीत काढल्याने सरकारच्या भूमिकेचा या वेळी निषेध करण्यात आला. पाण्याला जास्ती आणि दुधाला मातीमोल दर मिळत असल्याने शेतकरी, दूध उत्पादक हतबल झाले आहेत. तरीही या सरकार दुर्लक्ष करत असल्याने गतवर्षीच्या संपाचे स्मरण म्हणून सरकारचे वर्षश्राद्ध घालत असल्याचे सरपंच डॉ. धनंजय धनवटे यांनी स्पष्ट केले. 

दुधाला आणि शेतीमालाला दर मिळत नसल्याने शुक्रवारी भूमिपुत्र शेतकरी संघटना, पीपल्स हेल्पलाईन व भ्रष्टाचार निर्मूलन समितीच्या कार्यकर्त्यांनी भाकड जनावरे आणून दुपारी बारा वाजता जिल्हाधिकारी कार्यालयासमोर आंदोलन केले. सरकारला शेतकरी दुश्‍मन वाटत आहेत. त्यानुसारच सरकार शेतकऱ्यांना वागणूक देऊन हेळसांड करत आहे, असा आरोप या वेळी आंदोलनकर्त्यांनी केला व सरकारच्या विरोधात घोषणा दिल्या. दुग्धविकासमंत्री महादेव जानकर याप्रश्‍नी काहीच करत नसल्याने त्यांची गोटा, भेसळयुक्त दुधाने तुला केली. ॲड. कारभारी गवळी, अनिल देठे, संतोष वाडेकर, संतोष कोरडे, मोहन आंधळे, प्रवीण भोर, गणेश सुपेकर, नीलेश औटी, सुनील खोडदे आदींसह कार्यकर्ते सहभागी झाले होते.