नगर : दुधाला, शेतीमालाला दर मिळत नसल्याने शुक्रवारपासून (ता. 1) सुरू झालेल्या शेतकरी संपात सहभागी होत अकोले (जि. नगर) येथे शेतकऱ्यांनी तहसील कार्यालयात घुसून दूध ओतले. किसान सभेचे राज्य सरचिटणीस डॉ. अजित नवले यांच्या नेतृत्वाखाली झालेल्या अंदोलनात मोठ्या प्रमाणात कार्यकर्ते सहभागी झाले होते.
शुक्रवारपासून राज्यात शेतकरी संपाला सुरवात झाली आहे. त्यात सहभागी होत अकोले येथे किसान सभेचे केंद्रीय अध्यक्ष डॉ. अशोक ढवळे व राज्य सरचिटणीस डॉ. अजित नवले यांच्या नेतृत्वाखाली आंदोलन करण्यात आले. रोहिदास धुमाळ, महेश नवले, डॉ. कडलग, नामदेव भांगरे, नामदेव साबळे, विलास आरोटे आदींसह कार्यकर्ते आंदोलनात सहभागी झाले होते.
सकाळी साडेअकरा वाजता कार्यकर्ते तहसील कार्यालयात जमल्यानंतर त्यांना आत जाण्यास मज्जाव करण्यात आला. मात्र कार्यकर्त्यांनी गेट उघडून तहसील कार्यालयात प्रवेश केला व दूध ओतून सरकारच्या भूमिकेचा निषेध केला.
सरकार शेतकऱ्यांची चेष्टा करतेय. गतवर्षी सुरू झालेल्या संपाला एक वर्ष पूर्ण झाले, मात्र सरकारने दिलेले एकही आश्‍वासन पूर्ण केले नाही. शेतकऱ्यांना सुख, समाधान देण्याची सरकारची मानसिकता नाही. शेतकरी सध्या मोठ्या संकटातून जात आहे. शेतीमाल, दुधाला दर मिळत नाही तोपर्यंत लढा सुरूच राहणार असल्याचे या वेळी डॉ. नवले यांनी स्पष्ट केले. आंदोलनात मोठ्या संख्येने शेतकरी सहभागी झाले होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.