रनाळे परिसरातील शेतकऱ्यांचा पाणीप्रश्नी रास्ता रोको

नंदुरबार  ः बुराई प्रकल्प पूर्ण करून त्यात तापी नदीवरून पाणी आणण्याची व्यवस्था करावी, शेतकऱ्यांना दुष्काळी स्थितीतून बाहेर काढण्यासाठी शासनाने तातडीने कार्यवाही करावी यासह विविध मागण्यांसाठी शनिवारी (ता. २९) सकाळी रनाळे व परिसरातील शेतकऱ्यांनी दोंडाईचा - नंदुरबार मार्गावर रास्ता रोको आंदोलन केले.

शेतकऱ्यांनी सुमारे एक तास हा मार्ग रोखून धरला. रनाळे गावासह परिसरातील सुमारे दोन हजार शेतकरी या आंदोलनात उत्स्फूर्तपणे सहभागी झाले. या वेळी शासनाच्या शेतकरी विरोधी भूमिकेचा निषेध करण्यात आला. काही राजकीय पक्षांचे पदाधिकारीदेखील या आंदोलनात सहभागी झाले. या मार्गावरील वाहतूक दोन तास ठप्प झाली.  पोलिस व वाहतूक शाखेच्या कर्मचाऱ्यांची चांगलीच दमछाक झाली. शेतकऱ्यांना रस्त्यावरून दूर करण्याचा प्रयत्न सुरक्षा यंत्रणांनी केला. परंतु शेतकरी कुणाचेही ऐकून घेण्याच्या मनःस्थितीत नव्हते.

बुराई प्रकल्पाचा लाभ नंदुरबारसह धुळे जिल्ह्यातील शिंदखेडा व साक्री तालुक्‍यासही मिळू शकतो. परंतु या प्रकल्पाचे कामच बंद आहे. बुराई नदीला पाणी फारसे येत नाही. हा अवर्षणप्रवण भाग असल्याने शेती व परिसरातील २०-२२ गावांमधील पिण्याच्या पाण्याची समस्या गंभीर आहे. परंतु बुराई प्रकल्पाचे कामच पूर्ण होत नाही. बुराई प्रकल्पात प्रकाशा बॅरेज किंवा तापी नदीतून उपसा सिंचन यंत्रणा कार्यरत करून पाणी पोचविण्यासाठी जलवाहिनीचे काम पाच वर्षांपूर्वी सुरू होते. परंतु हे काम बंद पडले. यामुळे बुराई प्रकल्प बारमाही कोरडा असतो. या प्रकल्पाचे काम तातडीने हाती घेतले जावे, अशी मागणी शेतकऱ्यांनी केली. नंदुरबार जिल्हा प्रशासनातील अधिकारी व काही लोकप्रतिनिधींनी आंदोलनकर्त्यांसह काही गावांचे सरपंचांशी मोबाईलद्वारे संपर्क साधला आणि समजूत काढली. यानंतर हे आंदोलन मागे घेण्यात आल्याची माहिती मिळाली.