‘स्वाभिमानी’च्या कार्यकर्त्यांनी दाखवले मंत्र्यांना काळे झेंडे

नगर  : शेतकऱ्यांना दुधाला पाच रुपये अनुदान देण्याची घोषणा केली. परंतु अजूनही अनुदान दिले नाही. याचा निषेध करत स्वाभिमानी शेतकरी संघटनेच्या कार्यकर्त्यांनी सोमवारी (ता. १५) महसूल मंत्री चंद्रकांत पाटील, जलसंधारण मंत्री राम शिंदे यांना काळे झेंडे दाखवले. राहुरी येथे महात्मा फुले कृषी विद्यापीठात हा प्रकार घडला. पोलिसांनी कार्यकर्त्यांना ताब्यात घेतले.

दुधाला दर मिळावा यासाठी काही महिन्यांपूर्वी स्वाभिमानी शेतकरी संघटनेतर्फे आंदोलन करण्यात आले होते. त्या वेळी सरकारने प्रतिलिटर पाच रुपये अनुदान देण्याची घोषणा केली होती. मात्र त्याला काही महिन्यांचा कालावधी झाला तरी अजूनही सरकारने अनुदान दिलेले नाही. त्याबाबत सरकार अजूनही काही बोलत नसल्याने ‘स्वाभिमानी’चे कार्यकर्ते संतप्त आहेत. महात्मा फुले कृषी विद्यापीठात किसान आधार संमेलनाच्या उद्‌घाटनासाठी महसूल, कृषिमंत्री चंद्रकांत पाटील आले होते.

कार्यक्रमात भाषण सुरू असताना आधीच लोकांत येऊन बसलेले ‘स्वाभिमानी’चे जिल्हाध्यक्ष रवींद्र मोरे, प्रकाश देठे, सतीश पवार यांच्यासह काही कार्यकर्त्यांनी अचानक उभे राहत श्री. पाटील यांना काळे झेंडे दाखवून ‘‘भाषणं काय ठोकताय, दुधाच्या अनुदानाचे काय झाले’’, अशी विचारणा केली. अचानक गोंधळ उडाल्यानंतर पोलिसांनी ताबडतोब कार्यकर्त्यांना ताब्यात घेत कार्यक्रमातून बाहेर नेले. या प्रकारानंतरही चंद्रकांत पाटील यांनी भाषण सुरूच ठेवले.