एकरकमी एफआरपीसाठी कऱ्हाड येथे आंदोलन

कऱ्हाड, जि. सातारा   ः एफआरपी आमच्या हक्काची... नाही कोणाच्या बापाची..., कोण म्हणतो देत नाय... घेतल्याशिवाय राहत नाय... एकरकमी एफआरपी मिळालीच पाहिजे... अशा घोषणा देत स्वाभिमानी शेतकरी संघटनेने सातारा जिल्हाध्यक्ष सचिन नलवडे यांच्या उपस्थितीत शनिवारी (ता. १२) एकरकमी एफआरपीसाठी आंदोलन केले. संघटनेच्या वतीने कारखान्यांच्या गटआॅफिसला टाळे ठोकून, ठिकठिकाणी ठिय्या आंदोलनही करण्यात आले. येत्या आठ दिवसांत एफआरपी न दिल्यास पुन्हा तीव्र आंदोलन करण्यात येईल, असा इशाराही संघटनेच्या वतीने देण्यात आला.  

स्वाभिमानी शेतकरी संघटनेने एकरकमी एफआरपी मिळावी, यासाठी यापूर्वी साखर कारखानदार, साखर आयुक्तांना निवेदन देऊन मागणी केली होती. मात्र त्याची दखल कारखानदारांनी घेतली नाही. त्यामुळे शनिवारी साखर कारखान्यांच्या गटआॅफिसला टाळे ठोको आंदोलन करण्यात आल्याची सातारा जिल्हाध्यक्ष श्री. नलवडे यांनी सांगितले.  येथील दत्त चौक परिसरातील कृष्णा कारखान्याच्या गट आॅफिसमध्ये जाऊन काही काळ ठिय्या मारून पुन्हा कार्यालयाच्या दाराला टाळे ठोकण्यात आले. रयत कारखान्याच्या कार्यालयासमोरही आंदोलन करण्यात आले.

त्यानंतर बोलताना श्री. नलवडे यांनी एकरकमी एफआरपी देण्याचा कायदा कारखानदार जर मोडणार असतील, तर आम्हीही कायद्याचा भंग करून आंदोलन करू. ज्याप्रमाणे सरकार आम्ही आंदोलन करताना कायद्याचा धाक दाखवते. त्याप्रमाणे कायदा तोडणाऱ्या साखर कारखानदारांनाही धाक दाखवून त्यांना तुरुंगात डांबावे. आठ दिवसांत सर्व कारखान्यांनी एफआरपीप्रमाणे जर बिले जमा केली नाहीत तर संघटनेच्या वतीने खासदार राजू शेट्टी यांच्या मार्गदर्शनाखाली आंदोलन करू. याची जबाबदारी साखर कारखानदार आणि प्रशासनाची राहील, असाही इशारा त्यांनी दिला.

या वेळी संघटनेचे विकास पाटील, शिवाजी पाटील, लालासाहेब साळुंखे, मनोज जाधव, कृष्णत क्षीरसागर, सज्जन माने, प्रकाश धोकटे, कृष्णा मदने, सुभाष नलवडे, योगेश झांबरे, अमर कदम, तुकाराम खोचरे, सागर माने यांच्यासह शेतकरी उपस्थित होते.