पाण्यासाठी भीमा नदीपात्रात ठिय्या आंदोलन

 मांडवगण फराटा, जि. पुणे  : घोड आणि चासकमान धरण १०० टक्के भरल्यानंतरही पाण्याचे योग्य प्रकारे नियोजन न केल्याने भीमा नदीचे पात्र कोरडे पडले आहे. या दुष्काळी स्थितीमुळे पिण्याच्या पाण्याचा आणि शेतीचा प्रश्न गंभीर झाला आहे. पाण्याअभावी जळून चाललेली चारा पिके, फळपिकांचे पंचनामे करून नुकसान भरपाई द्यावी, पिण्याच्या पाण्यासाठी टॅंकर सुरू करावेत या मागण्यांसाठी शनिवारी (ता. १८) राष्ट्रवादी काँग्रेसतर्फे माजी आमदार अशोक पवार यांच्या नेतृत्वाखाली ठिय्या आंदोलन करण्यात आले. 

शिरूर तालुक्याचा पूर्व भाग आणि दौंड तालुक्यात भीमा नदीचे पात्र कोरडे पडले आहे. या भागात जनावरांची संख्या मोठ्या प्रमाणात असून, पाणी आणि चाऱ्याअभावी दूध व्यवसाय अडचणीत आला आहे, तर पिण्याच्या पाण्याची टंचाई वाढत आहे. दुष्काळी स्थितीकडे शासनाने पूर्णपणे दुर्लक्ष केल्याचे श्री. पवार यांनी सांगितले. यावेळी नायब तहसीलदार दिलीप जाधव यांना मागण्यांबाबत निवेदन देण्यात आले.  जिल्हा परिषदेच्या कृषी सभापती सुजाता पवार, वैशाली नागवडे, अप्पासाहेब पवार, रवी काळे, बाबासाहेब फराटे, मनीषा सोनवणे, सीमा फराटे, प्रतिभा बोत्रे, निर्मला ढवळे आदी या वेळी उपस्थित होते.