वडगाव येथील पाटबंधारे कार्यालयासमोर ठिय्या

वडगाव निंबाळकर, जि. पुणे  ः नीरा डावा कालव्यावरील वितरिका क्रमांक ८, ९, १० आणि ११ यामधून पिण्यासाठी पाणी सोडावे, या मागणीसाठी सदोबाचीवाडी होळ परिसरातील नागरिकांनी वडगाव निंबाळकर पाटबंधारे कार्यालयात रविवारी सकाळी ठिय्या मांडला. 

या परिसरातील शेतीसाठी पाण्याचे आवर्तन झाले आहे. याला बराच कालावधी लोटला आहे. या वितरकांच्या बाजूला मोठ्या प्रमाणात लोकवस्ती आहे. सार्वजनिक पाणी पुरवठ्याच्या विहिरी वितरकांच्या कडेला आहेत. लाभधारक शेतकऱ्यांसाठी शेतीला पाणी अत्यल्प प्रमाणात दिले गेले. यामुळे पिकांनाही पुरेसे पाणी मिळाले नाही. पूर्वनियोजित नसणाऱ्या शेतकऱ्यांनीही वितरिकेचे पाणी घेतले; परिणाम लाभधारक शेतकऱ्यांना पिकांना पुरेसे पाणी मिळाले नाही. ठराविक कोठा पूर्ण झाल्यावर आवर्तन थांबवण्यात आले. यामुळे शेतकऱ्यांची तारांबळ उडाली आहे. आता शेवटच्या टप्प्यात तरी लोकवस्तीला पिण्यापुरते पाणी सोडावे, या मागणीसाठी सदोबाचीवाडी होळ परिसरातील शेतकरी कार्यालयासमोर एकत्र आले, सुरवातीला आंदोलन करण्याची तयारी ग्रामस्थांनी केली होती, पण आचारसंहिता असल्यामुळे आंदोलन न करता पाटबंधारे कार्यालयाच्या दारात शेतकरी बसून राहिले. 

यामध्ये सरपंच विलास होळकर, उपसरपंच विनोद भोसले, दीपक होळकर, सतीश सूर्यवंशी, विजयकुमार निंबाळकर यांच्यासह सुमारे शंभर ग्रामस्थ उपस्थित होते. पाणीवापर संस्थेचे अध्यक्ष आनंदकुमार होळकर, पाटबंधारे शाखाधिकारी बाजीराव पोंदकुले, शरद मोरे यांनी ग्रामस्थांचे मत ऐकून घेतले; आपली मागणी वरिष्ठांपर्यंत पोचवली जाईल, असे शाखाधिकारी पोंदकुले यांनी सांगितले.