थायलंड देणार भारतातल्या कृषी शिक्षणाला व्यावसायिक शेतीची जोड

बारामती, जि. पुणे : अॅग्रिकल्चरल डेव्हलपमेंट ट्रस्ट, बारामती संचालित कृषी महाविद्यालयाने शेतीच्या अाधुनिक शिक्षणातील पुढचा टप्पा गाठताना नेदरलॅंडनंतर आता थायलंडशीही कृषी शिक्षणाबाबत करार केला आहे. भारतातील शेती शिक्षणाला थायलंडमधील व्यावसायिक शेतीची जोड देणारा हा भारतातील पहिलाच अभ्यासक्रम ठरला आहे.  राहुरीचे महात्मा फुले कृषी विद्यापीठ, बॅंकॉक येथील एशियन इन्स्टिट्यूट ऑफ टेक्नॉलॉजी व कृषी महाविद्यालयामध्ये याचा औपचारिक करार २ नोव्हेंबर २०१७ ला करण्यात आला. ट्रस्टचे प्रमुख राजेंद्र पवार, बॅंकाक येथील इन्स्टिट्यूटचे पीयूष सोनी व राहुरी विद्यापीठाचे कुलगुरू के. पी. विश्वनाथा यांनी या करारावर स्वाक्षऱ्या केल्या, तर या करारावर माजी केंद्रीय कृषिमंत्री शरद पवार व राज्याचे कृषिमंत्री पांडुरंग  फुंडकर यांनी शिक्कामोर्तब केले.  या झालेल्या करारानुसार असलेल्या अभ्यासक्रमात राहुरी येथील महात्मा फुले कृषी विद्यापीठात कृषी पदवी अभ्यासक्रमात शिकणारे विद्यार्थी हे बीएस्सी अॅग्रीच्या पदवीच्या शेवटच्या हंगामातील आठवे सत्र हे बॅंकॉक येथे जाऊन शिकतील. तेथे तब्बल २० आठवड्यांच्या कालावधीत तेथील हरितगृहातील उच्च तंत्रज्ञान, मातीविना शेती, हायड्रोपोनिक्स, एरोपोनिक्स, भाजीपाला तसेच फळबाग तंत्रज्ञान शिकतील. त्याचा उपयोग भविष्यात भारतातील शेतीतील अडचणींवर मात करण्यासाठी व शेतीच्या शाश्वत विकासासाठी होईल. थायलंडमधील हा कृषी अभ्यासक्रम भारतातील विद्यार्थ्यांसाठी उपलब्ध करण्याच्या दृष्टीने बारामतीच्या कृषी महाविद्यालयाने राहुरी विद्यापीठाने वेळोवेळी आयोजित केलेल्या कृषी अभ्यास मंडळ व कृषी विद्या शाखांच्या बैठकीत प्रात्यक्षिक सादरीकरण केले व कृषी क्षेत्रातील तेथील अनुभवात्मक प्रात्यक्षिके किती महत्त्वाची आहेत हे पटवून देत शिक्षण अभ्यासक्रमासाठी मंजुरी मिळवली. हा सामंजस्य करार घडवून आणण्यासाठी अॅग्रिकल्चरल डेव्हलपमेंट ट्रस्टचे प्रमुख राजेंद्र पवार, कृषी महाविद्यालयाचे शिक्षण संचालक नीलेश नलावडे, महात्मा फुले कृषी विद्यापीठाच्या उद्यान विद्या विभागाचे प्रमुख प्राध्यापक श्रीमंत रणपिसे, कृषी महाविद्यालय बारामतीच्या उद्यान विद्या विभागाचे प्रमुख मच्छिंद्र आगळे व प्राध्यापक गणेश शिंदे यांनी प्रयत्न केले. असा अभ्यासक्रम राबविणारे महात्मा फुले कृषी विद्यापीठ राहुरी हे देशातील पहिले विद्यापीठ, तर बारामती हे पहिले कृषी महाविद्यालय आहे.