कृषीच्या विद्यार्थ्यांना अपारंपरिक ऊर्जा विकासाचे धडे

नागपूर : कृषी अभियांत्रिकीच्या विद्यार्थ्यांना अपारंपरिक ऊर्जाक्षेत्राशी संबंधित कौशल्य विकासाचे धडे देत त्या माध्यमातून त्यांच्यामध्ये उद्योजकता निर्माण करण्याकरिता भारतीय कृषी संशोधन परिषदेने तब्बल पाच कोटी रुपयांच्या प्रकल्पाला मान्यता दिली आहे. अकोला येथील डॉ. पंजाबराव देशमुख कृषी विद्यापीठाच्या माध्यमातून या प्रकल्पाची अंमलबजावणी होईल. भारतीय कृषी संशोधन परिषदेकडे देशभरातून तब्बल १२७ प्रकल्पांचे सादरीकरण करण्यात आले होते. यातील केवळ २६ प्रकल्पांना मान्यता देत निधी देण्यात आला आहे. त्यामध्ये डॉ. पंजाबराव देशमुख कृषी विद्यापीठातील अपारंपरिक ऊर्जास्रोत व विद्युत अभियांत्रिकी विभागाच्या प्रकल्पाचा समावेश आहे. पारंपरिक ऊर्जास्रोतांच्या मर्यादा लक्षात घेता अपारंपरिक ऊर्जास्रोत काळाची गरज आहे. त्या पार्श्‍वभूमीवर या क्षेत्राशी निगडित बाबींची माहिती विद्यार्थ्यांना व्हावी व त्यातून उद्योजकता वाढीस लागावी, असा प्रकल्पाचा उद्देश आहे.  २०१७-१८ ते २०२०-२१ असा या प्रकल्पाच्या अंमलबजावणीचा कालावधी आहे. त्याकरिता ५ कोटी रुपयांची तरतूद करण्यात आली आहे. जागतिक बॅंकेने हा निधी दिल्याची माहिती सूत्रांनी दिली. अपारंपरिक ऊर्जास्रोत व विद्युत अभियांत्रिकी विभागाचे प्रमुख डॉ. सुरेंद्र काळबांडे हे या प्रकल्पाचे प्रमुख अन्वेषक आहेत. प्रा. विवेक खांबलकर प्रकल्प समन्वयक, तर सह समन्वयक म्हणून धीरज कराळे काम पाहतील. प्रकल्पाच्या अंमलबजावणीकरिता पदभरती करणार असल्याचे सूत्रांनी सांगितले. 

चारही विद्यापीठांना लाभ या प्रकल्पाच्या अंमलबजावणीअंतर्गत चारही कृषी विद्यापीठांतील कृषी अभियांत्रिकी शाखेच्या विद्यार्थ्यांना अपारंपरिक ऊर्जास्रोतांशी संबंधित कौशल्यविकासाचे धडे देण्याचे प्रस्तावित आहे. त्यामध्ये राहुरी, दापोली, परभणी व अकोला येथील कृषी विद्यापीठांचा समावेश आहे.