कृषी विभागातील लिपिकांचा लेखनीबंद आंदोलनाचा इशारा

नागपूर ः कृषी सेवकाकडून लिपिकाला झालेली मारहाण याप्रकरणी पोलिस तक्रारीनंतरही कारवाई न होणे आणि त्यानंतर त्याच कृषी सेवकाकडून लिपिकाला धमक्‍या मिळणे या विरोधात लेखनीबंद आंदोलनाचा इशारा महाराष्ट्र राज्य कृषी विभाग लिपिक संवर्ग संघटनेने दिला आहे. या संदर्भाने प्रभारी विभागीय कृषी सहसंचालक प्रज्ञा गोळघाटे यांना निवेदन देण्यात आले.

चंद्रपूर जिल्ह्याच्या चिमुर तालुका कृषी कार्यालयाअंतर्गत नीलेश राठोड हे कृषी सेवक असून त्यांच्याकडे मदनापूर गावाचा प्रभार आहे. नोव्हेंबर २०१६ मध्ये निर्माण झालेल्या कार्यालयीन अडचणीसंदर्भाने जाणून घेण्याकरिता ते तालुका कृषी कार्यालयातील लिपीक व्ही. के. कोराम यांच्याकडे गेले. या वेळी नीलेश राठोड व व्ही. के. कोराम यांच्यात वाद झाल्याचे सूत्रांनी सांगीतले. या वादातच नीलेश राठोड यांनी कोराम यांना मारहाण केल्याचा आरोप आहे.

याप्रकरणी चिमूर पोलिसांत त्याचवेळी रितसर तक्रारही देण्यात आली. परंतु, पोलिसांकडून तसेच खात्याअंतर्गंतदेखील याप्रकरणी कोणतीच कारवाई झाली नाही. त्यामुळे मनोबल वाढल्याने नीलेश राठोड हे लिपीक कोराम यांना कार्यालयात जाऊन धमक्‍या देत असल्याचा आरोप लिपीकवर्गीय संघटनेने या वेळी केला.

कृषी सेवक नीलेश राठोड यांच्यावर कारवाईच्या मागणीसाठी १५ जानेवारी पासून चंद्रपूर जिल्ह्यात लेखनीबंद आंदोलन सुरू करण्यात आले आहे. १७ नोव्हेंबरपासून नागपूर विभागातील सर्व लिपीकवर्गीय कर्मचारी काळ्या फिती लावून काम करतील. त्यानंतर आठवडाभरात नीलेश राठोड यांच्यावर कारवाई न झाल्यास नागपूर विभागात देखील लेखनीबंद आंदोलनाची सुरवात होईल, असा इशारा देण्यात आला आहे.