निर्यात वाढविण्यासाठी कृषी विभाग प्रयत्न करणार ः जगताप

परभणी ः शेतकऱ्यांनी आधुनिक तंत्रज्ञानाचा वापर करून सरंक्षित शेती, सूक्ष्म सिंचन पद्धती अवलंब करावा. उत्पन्नात वाढ करण्यासाठी निर्यातक्षम शेतीमालाचे उत्पादन घ्यावे. जिल्ह्यातील निर्यात वाढविण्याच्या दृष्टीने कृषी विभागाकडून प्रयत्न केले जातील, असे प्रतिपादन लातूर कृषी विभागाचे सहसंचालक टी. एन. जगताप यांनी केले.

कृषी विज्ञान केंद्र आणि आत्मा यांच्यातर्फे आयोजित निर्यातक्षम भाजीपाला उत्पादन तंत्रज्ञान प्रशिक्षणाच्या उद्‌घाटन कार्यक्रमामध्ये शुक्रवारी (ता. १२) ते बोलत होते. अध्यक्षस्थानी लक्ष्मीताई देशमुख या होत्या. या वेळी जिल्हा अधीक्षक कृषी अधिकारी बी. आर. शिंदे, निर्यात तज्ज्ञ गोविंद हांडे, केव्हीचे प्रमुख तथा वरिष्ठ शास्त्रज्ञ डॉ. प्रशांत भोसले, उद्यानविद्या विभाग प्रमुख डॉ. जी. एम. वाघमारे, अमित तुपे, सिरपूर (ता. पालम) येथील निर्यातक्षम भेंडी उत्पादक गटातील शेतकरी सुभाष आवरगंड, पशुपतीनाथ शेवटे, गुलाब उत्पादक शेतकरी मोहन कापसे, आळंबी उत्पादक शेतकरी एकनाथ मुंजे आदी उपस्थित होते.

या वेळी श्री. जगताप म्हणाले, निर्यातक्षम भाजीपाला उत्पादनासाठी कृषी विभाग तसेच कृषी विज्ञान केंद्राने एकत्र काम करावे. श्री. शिंदे म्हणाले, कृषी विभागातर्फे निर्यातवृद्धीसाठी प्रयत्न केले जातील. तांत्रिक सत्रामध्ये डॉ. वाघमारे यांनी भेंडी लागवड तंत्रज्ञान विषयावर माहिती दिली.