शेतकऱ्यांनी चारा पिकांवर भर द्यावा ः कृषी आयुक्त

पुणे  : नव्या वर्षाच्या सुरवातीलाच कृषी क्षेत्राला दुष्काळाला सामोरे जावे लागणार आहे. शेतकऱ्यांनी न डगमगता नैसर्गिक आपत्तीशी सामना करावा. विशेषतः चारा पिकांवर आता भर द्यावा लागेल, असा सल्ला कृषी आयुक्त सच्चिंद्र प्रताप सिंह यांनी दिला आहे.

राज्यातील १५१ तालुक्यांत दुष्काळ जाहीर झाला आहे. ११२ तालुक्यात गंभीर आणि ३९ तालुक्यांत मध्यम स्वरूपाचा दुष्काळ सरकारने जाहीर केला आहे. त्यासाठी अत्यावश्यक असलेली सर्व माहिती श्री. सिंह यांच्या चमुनेच राज्य शासनाकडे सुपुर्द केली. त्याआधारावर केंद्र शासनाकडे अहवाल पाठविला आहे. राज्यात काही भागांत दुष्काळाची तीव्रता आहे. मात्र, सर्वत्र हिच स्थिती असल्याचे मानून नकारात्मक पद्धतीने पुढे जाता येणार नाही. पाणी असलेल्या शेतकऱ्यांनी आता चारा पिकांवर लक्ष वळवावे. पाऊस नसल्याने पाण्याअभावी रब्बी ज्वारी कमी होणार आहे. मराठवाड्यात अडचण जास्त आहे. पण, पाणी असलेल्या पट्ट्यांमध्ये पाण्याचे नियोजन करून चाऱ्यावर भर द्यावा लागेल, असेही श्री. सिंह म्हणाले. 

दुष्काळी स्थितीत चाऱ्याबाबत पशुसंवर्धन विभागाकडून स्वतंत्र नियोजन सुरू आहे. कृषी विभागदेखील प्रत्येक टप्प्यावर शेतकऱ्यांबरोबर आहे. फक्त जादा पाणी लागणारी पिके टाळता येतील का, याचा विचार आता प्रत्येकानेच करावा. जादा पाणी असलेली पिके घेऊच नका असे मी म्हणणार नाही. तथापि, किमान ठिबकवर तरी लागवड व्हावी, असे श्री. सिंह यांनी सांगितले.