पीक विमा हप्त्याची रक्कम गेली कुठे

पीक विमा हप्त्याची रक्कम गेली कुठे
पीक विमा हप्त्याची रक्कम गेली कुठे

अकोला : ‘शासकीय काम, सहा महिने थांब’ अशी एक उपरोधिक म्हण प्रचलित झालेली अाहे. यातून शासनाच्या संथ कामकाज शैलीवर बोट ठेवले जाते. याचा कटू अनुभव काळेगाव येथील शेतकरी सहा महिनेच नव्हे तर गेली दोन-अडीच वर्षे घेत अाहेत.  २०१३-१४ मध्ये रब्बी हंगामात खामगाव तालुक्यात गहू व हरभरा पिकाला विमा मंजूर झाला; मात्र काळेगावातील शेतकऱ्यांना अद्यापही विमा मिळाला तर नाहीच, शिवाय अापण भरलेली विमा हप्ता रक्कमसुद्धा नेमकी कुठे गेली याचा शोध लागलेला नाही. मजेशीर बाब म्हणजे शेतकऱ्यांनी खामगाव येथे बँक शाखेत भरलेली रक्कम संबंधित शाखेने त्यांच्या विभागीय कार्यालयाकडेसुद्धा पाठवली. परंतु विमा कंपनीला हे पैसेच मिळाले नसल्याचे संबंधित कंपनीने सांगितले. याबाबत शेतकऱ्यांनी कृषी विभागाकडे व कृषी विभागाने बँक अाणि विमा कंपनीकडे वेळोवेळी पाठपुरावा करूनही काहीही झालेले नाही.  खामगाव तालुक्यातील काळेगाव मंडळात २०१३-१४ च्या रब्बी हंगामात गहू व हरभरा पिकाला विमा मंजूर झाला होता. अापल्याला मदत मिळेल म्हणून त्यावेळी शेतकरी अानंदी झाले होते. याच गावातील काही शेतकऱ्यांना ज्यांनी दुसऱ्या बँकेत विमा रक्कम भरली त्यांना मदतही मिळाली. परंतु ज्यांनी बँक अाॅफ इंडियाच्या खामगाव शाखेत विमा रक्कम भरली त्यांना अद्यापही हा लाभ मिळाला नाही. शेतकऱ्यांनी याबाबत कृषी विभागाकडे पाठपुरावा केला. त्यानंतर विमा रकमेचा शोध सुरू झाला. कृषी विभागाने बँक शाखा व्यवस्थापकाला तसेच विमा कंपनीकडे विचारणा केली. बँक व्यवस्थापकाने शेतकऱ्यांना माहिती देताना अापल्या झोनल अाॅफिसमार्फत ३१ डिसेंबर २०१३ ला विमा कंपनीला डीडीद्वारे ३७११ रुपये पाठवले, असे लेखी कळवले. दुसरीकडे विमा कंपनीनेही कृषी विभागाला पत्र देत बँकेकडून कोणत्याही प्रकारची पीकविमा हप्ता रक्कम प्राप्ती झाली नसल्याचे लेखी कळवले. बँकेकडून विमा हप्ता पाठवल्याचा दावा केला जातो तर विमा कंपनी कुठलाही हप्ता रक्कम बँकेकडून मिळाली नसल्याचे सांगत अाहे. गेले दोन वर्षे हे प्रकरण रेंगाळलेले अाहे. या संदर्भात काळेगाव येथील गोपाल दामोदर साठे व ४६ शेतकऱ्यांनी ठिकठिकाणी निवेदने दिली. पाठपुरावा केला. मात्र काहीही झालेले नसल्याचे समोर अाले अाहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com