भारत-अमेरिका सहकार्यातून शेतीविकास : चंद्रबाबू

वॉशिंग्टन ः भारत आणि अमेरिकेतील संबंध दोन्ही देशांच्या विकासासाठी पूरक आहेत. परस्पर सहकार्यात वाढ झाल्यास दोन्ही देशांतील शेतीला फायदा होईल. परस्परांच्या मदतीने शेती उत्पादनात वाढ होऊन अपेक्षित उत्पादनाची पातळी गाठता येईल, असे प्रतिपादन आंध्र प्रदेशचे मुख्यमंत्री चंद्राबाबू नायडू यांनी येथे केले.  लोवा स्टेट विद्यापीठाच्या सहयोगाने अमेरिका- भारत धोरणात्मक भागीदारी मंच (यूएसआयएसपीएफ)च्या वतीने आयोजित जागतिक अन्नासंबंधी आयोजित बैठकीचा शेती हा एक विषय होता. या बैठकीला आंध्र प्रदेशचे मुख्यमंत्री चंद्राबाबू नायडू हे उपस्थित होते. या वेळी झालेल्या एका विशेष बैठकीत ते बोलत होते. या बैठकीला भारत सरकारचे प्रतिनिधी मंडळ, तसेच अमेरिकेच्या कृषी विभागाचे प्रतिनिधी, अमेरिका- भारत फाउंडेशन, ग्लोबल फूड बॅंकिंग नेटवर्क आणि इतर कंपन्यांचे प्रतिनिधी उपस्थित होते. या विशेष बैठकीचा मुख्य उद्देश आंध्र प्रदेशातील शेतकऱ्यांना आधुनिक आणि अद्ययावत तंत्रज्ञानाचा वापर, जास्त उत्पादन देणाऱ्या पिकांच्या जातींची लागवड करणे आणि शेतीचे उत्पादन आणि उत्पादकतावाढीसाठी शेतकऱ्यांचा कौशल्यविकास व्हावा यासाठी त्यांना प्रशिक्षण आदी शेती विस्तार सेवा पुरवण्यासाठी अमेरिकेचा कृषी विभाग कोणत्या क्षेत्रात काम करू शकतो याची चाचपणी करणे हा होता.  बैठकीत भारत सरकारच्या प्रतिनिधींसोबत भारत- अमेरिका यांच्यातील गुंतवणूक आणि व्यापाराच्या संधी आणि त्यातील आव्हाने यावर विचारमंथन करण्यात आले. तसेच, शेती आणि अन्नक्षेत्रात असणाऱ्या व्यापार व गुंतवणूक संधीवर चर्चा झाली.  ‘‘अमेरिका आणि आंध्र प्रदेश यांच्यामध्ये परस्पर सहकार्याच्या अनेक संधी आहेत. आंध्र प्रदेशाने मेगा फूड पार्क आणि कोल्ड स्टोअरेज निर्मितीत पुढाकार घेत यशस्वी झेप घेतली आणि यासारख्या प्रयत्नांतून भारतीय अन्न आणि शेती उद्योगात आपले वर्चस्व सिद्ध केले आहे,’’ असे ‘यूएसआयएसपीएफ’चे अध्यक्ष मुकेश अघी यांनी सांगितले. मुख्यमंत्री नायडू म्हणाले, की सहकार्यातून दोन्ही देशांच्या नवीन संकल्पना आणि तांत्रिक ज्ञानाची देवाणघेवाण होऊन शेती उत्पादनात वाढ होऊन अपेक्षित उत्पादन मिळेल. याचा फायदा दोन्ही देशांना होईल. ५०० आयटी उद्योग स्थापण्याचे उद्दिष्ट या वेळी मुख्यमंत्री चंद्राबाबू नायडू यांनी अमेरिकेतील ८० आयटी कंपन्यांच्या प्रतिनिधींची भेट घेतली. या वेळी आंध्र प्रदेशात येत्या वर्षभरात ५०० नवीन आयटी उद्योग सुरू करण्याचे उद्दिष्ट ठेवण्यात आले आहे. त्यांनी आपल्या लोवा स्टेट विद्यापीठाच्या भेटीत पीक जनुक आणि शेती उत्पादनवाढीच्या पद्धती याविषयी माहिती घेतली आणि या तंत्रज्ञानाचा आंध्र प्रदेशात वापर कसा करता येईल याची चाचपणी केली.