कापूस, धान, फळबाग, भाजीपाला नुकसानग्रस्तांना मदत जाहीर

नागपूर ः बोंड अळीसाठी कापूस उत्पादक; तसेच तुडतुड्यासाठी धान उत्पादक शेतकऱ्यांना हेक्‍टरी मदतीची घोषणा करीत कृषिमंत्री पांडुरंग फुंडकर यांनी शुक्रवारी (ता.२२) दिलासा दिला. कापूस उत्पादकांना हेक्‍टरी ३७ हजार ५००; तर धान (भात) उत्पादकांना हेक्‍टरी १४ हजार ६७० रुपयांची मदत केली जाणार आहे. याशिवाय ‘ओखी’ वादळामुळे फळबागांच्या झालेल्या नुकसानीसाठी ४३ हजारापर्यंत; तर भाजीपाल्यासाठी १३ हजार ५०० रुपये मदतीची घोषणाही फुंडकर यांनी विधानसभेत केली.  अधिवेशन सुरू झाल्यापासून विरोधकांनी शेतकऱ्यांना मदतीची मागणी लावून धरली होती. सरकारने विरोधकांना मदतीबाबत आश्‍वस्त केले होते. अधिवेशनाच्या शेवटच्या दिवशी विधानसभेत फुंडकर यांनी धान, कापूस, फळबागा, भाजीपाला नुकसानग्रस्त शेतकऱ्यांना मदत जाहीर केली. कोरडवाहू धान उत्पादकांना राष्ट्रीय नैसर्गिक आपत्ती निधीतून ६८०० आणि पीकविम्याचे ११७० रुपये अशी एकूण ७९७० रुपये हेक्‍टरी मदत करण्यात येईल. याशिवाय बागायती धान उत्पादकांना राष्ट्रीय नैसर्गिक आपत्ती निधीतून १३ हजार ५०० रुपये आणि पीकविम्याची ११७० अशी एकूण १४ हजार ६७० रुपये हेक्‍टरी मदत देण्यात येईल, असे फुंडकर यांनी सांगितले. ही मदत दोन हेक्‍टरपर्यंत राहणार आहे. याशिवाय धान उत्पादकांना २०० रुपये प्रतिक्विंटल बोनस देण्यात येईल. बोनससाठी ५० क्‍विंटलची मर्यादा आहे. धानासाठीची मदत दुष्काळग्रस्त भागातील तीन तालुक्‍यांना देण्यात येणार आहे.  बोंडअळीमुळे नुकसान झालेल्या सेंद्रिय पद्धतीने कापूस उत्पादन करणाऱ्या शेतकऱ्यांना हेक्‍टरी ३० हजार ८०० रुपये मदत करण्यात येईल. यात राष्ट्रीय नैसर्गिक आपत्ती निधीतून ६८००, विमा कंपनीकडून आठ हजार; तर बियाण्यांच्या कंपन्यांकडून १६ हजारांच्या मदतीचा समावेश आहे. बागायती कापूस उत्पादकांना हेक्‍टरी ३७ हजार ५०० रुपयांची मदत देण्यात येईल. यात राष्ट्रीय नैसर्गिक आपत्ती निधीतून १३ हजार ५००, विमा कंपनीकडून आठ हजार तर बियाणे कंपन्यांकडून नुकसानभरपाई म्हणून १६ हजार रुपयांचा समावेश आहे. कापूस उत्पादकांनाही दोन हेक्‍टरपर्यंत मदत करण्यात येईल. ‘ओखी’मुळे नुकसान झालेल्या फळपीक उत्पादकांना हेक्‍टरी ४३ हजारांपर्यंत मदत करण्यात येईल. १८ हजार रुपये नैसर्गिक आपत्ती निधीतून तर नऊ ते २५ हजारापर्यंत रक्कम पीक विम्यातून देण्यात येईल. भाजीपाला उत्पादकांना १३ हजार ५०० रुपये हेक्‍टरी मदत करण्यात येईल, असे त्यांनी जाहीर केले. यासंदर्भात नुकसानग्रस्त भागाचे पंचनामे करण्यास सुरवात झाल्याचे नमूद केले.