पुणे जिल्ह्यात मशागतीची कामे अंतिम टप्प्यात

पुणे  ः जिल्ह्यातील अनेक भागांत सध्या पूर्वमोसमी पाऊस होत आहे. त्यामुळे शेतकऱ्यांनी खरिपाची तयारी सुरू केली आहे. सध्या मशागतीची कामे अंतिम टप्प्यात आली असून, पश्‍चिम पट्ट्यातील तालुक्‍यांत भात रोपवाटिकेची कामे सुरू झाली आहेत. 

पुणे जिल्ह्यात खरिपाची दोन लाख ३० हजार हेक्‍टरवर पेरणी होण्याचा अंदाज आहे. पश्‍चिमेकडील भोर, वेल्हा, मावळ, मुळशी, उत्तरेकडील खेड, जुन्नर, आंबेगाव या तालुक्‍यात प्रामुख्याने भात पिकाची लागवड केली जाते. पूर्वेकडील शिरूर, दौंड, पुरंदर, बारामती, इंदापूर तालुक्‍यात सोयाबीन, तूर, मूग, उडीद ही पिके शेतकरी घेतात. यंदा चांगल्या पावसाची शक्‍यता असल्याने शेतकऱ्यांनी सुरवातीपासून खरिपाचे नियोजन करण्यास सुरवात केली आहे. त्यासाठी लागणाऱ्या निविष्ठांचा पुरवठा कृषी विभागामार्फत कृषी सेवा केंद्रांना सुरू आहे. त्यामुळे शेतकऱ्यांना लवकरच कृषी निविष्ठा उपलब्ध होतील. 

पश्‍चिम पट्ट्यात भात लागवडीसाठी मजुरांची टंचाई भासत असल्याने यांत्रिकीकरणाचा अवलंब करण्यावर शेतकऱ्यांचा सर्वाधिक भर राहणार आहे. त्यासाठी आत्मा व कृषी विभागामार्फत शेतकऱ्यांना यांत्रिकीकरणाद्वारे भात लागवड व त्यासाठीची रोपवाटिका याबाबत प्रशिक्षण देण्यात येत आहे. या प्रशिक्षणाचा लाभ घेत शेतकऱ्यांनी रोपवाटिकेची कामे सुरू केली आहे. काही ठिकाणी रोपवाटिकेत भात बियाणे टाकण्याची कामे सुरु आहेत.

पूर्वेकडील भागातही मशागतीची कामे सुरू आहेत. पाणी उपलब्ध असलेल्या काही ठिकाणी ऊस लागवडीची पूर्वतयारी शेतकरी करत आहेत. याविषयी वेल्हा तालुक्‍यातील वाजेघर येथील समीर शिळीमकर म्हणाले की माझी एकूण वीस एकर शेती आहे. ऊस साडेचार एकरावर आहे. भाताची पावणेदोन एकरावर लागवड करणार आहे. मशागतीची कामे पूर्ण झाली आहे. दोन ते तीन दिवसांपासून पाऊस होत आहे. पुन्हा एकदा मशागत करून भात लागवडीसाठी शेत तयार करणार आहे. त्यासाठी दोन ते तीन गुंठे क्षेत्रावर रोपवाटिका तयार केली आहे.