शेती पंपाला अखंडित वीजपुरवठा नाही

सांगली ः जिल्ह्यातील शेतीच्या पंपासाठीच्या विजेच्या रात्रीच्या वेळेतील भारनियमात दोन तासांनी वाढ केली आहे. वास्तविक पाहता शेती पंपाला अखंडित वीजपुरवठा होत नाही. यामुळे शेतकऱ्यांतून तीव्र नाराजी व्यक्त होते आहे.

जिल्ह्यात वाळवा, पलूस, कडेगाव, शिराळा तालुक्‍यांत विहीरी आणि बोअरवेलला पाणी मुबलक आहे, हे पाणी शेती पुरते आहे. मात्र, सातत्याने विद्युत पुरवठा खंडित होत असल्याने पाणी असूनदेखील शेतीला पाणी देणे शक्‍य होत नाही. तर दुष्काळी पट्ट्यातील भागातील पाण्याची पातळी खालावली आहे. उलपब्ध पाण्यावर शेती पिकवण्यासाठी या भागातील शेतकरी धडपड करत आहे. मात्र, वीजपुरवठा होत नसल्याने पाणी देण्यासाठी शेतकऱ्यांना तारेवरची कसरत करावी लागत आहे.

गेल्या काही दिवसांपासून वीजपुरवठाच्या कालावधी हळूहळू कमी करण्याचा घाट शासनाने घातला आहे. शेतीच्या पंपासाठी लागणारा दिवसा आठ तासांचा वीजपुरवठा तर रात्रीच्या वेळी दहा तास याप्रमाणे वीजपुरवठा करत असल्याचा दावा महावितरण कंपनी करत आहे. मात्र, वास्तवात शेतकऱ्यांना महावितरण कंपनीने दिलेल्या वेळेप्रमाणे वीजपुरवठाच होत नसल्याचे शेतकऱ्यांनी सांगितले.

सध्या जिल्ह्यात द्राक्षाची फळ छाटणी सुरू केली आहे. सुरवातीच्या काळात द्राक्ष पिकाला पाणी कमी लागते. मात्र, पुढील महिन्यापासून द्राक्ष पिकाला योग्य पाणी द्यावे लागते. मात्र, विद्युत पुरवठा सातत्याने खंडित होत राहिला तर, द्राक्ष उत्पादकामध्ये अडचणी निर्माण होतील. त्यामुळे शेतीच्या पंपासाठी वीजपुरवठा सुरळीत करावा, अशी मागणी शेतकऱ्यांकडून होऊ लागली आहे.

शेतीच्या पंपांचा वीजपुरवठा दोन तासांनी कमी केला आहे. सातत्याने वीजपुरवठा होत नाही. त्यामध्ये खंडित होत आहे. यामुळे द्राक्ष बागेला पाणी देण्यासाठी अडचणी निर्माण होत आहेत. - सुभाष आर्वे, माजी अध्यक्ष, महाराष्ट्र द्राक्ष बागायतदार संघ