‘कृषी’ला १३५४ कोटी निर्यात अनुदान

नवी दिल्ली : केंद्र सरकारने मंगळवारी (ता. ५) परकीय व्यापार धोरण २०१५-२०२० जाहीर केले. निर्यातवाढीसाठी विविध क्षेत्रांना ८५०० कोटींच्या प्रोत्साहनपर अनुदानाची घोषणा केंद्रीय वाणिज्य मंत्री सुरेश प्रभू यांनी केली. यामध्ये कृषी व पूरक उद्योगाच्या १३५४ कोटी निर्यात अनुदानाचा समावेश आहे. गेल्या वर्षी नोटाबंदी आणि त्यानंतर जीएसटीमुळे एकूणच निर्यात व्यापार काहीसा कमी झाला आहे. व्यापाऱ्यांमध्ये जीएसटीबाबत अद्यापही संभ्रम आहे. भरीस भर गुजरातची विधानसभा निवडणूक तोंडावर आहे. यामुळे केंद्र सरकारने याआधी जीएसटीची टक्केवारी काही प्रमाणात शिथिल केली होती. मात्र, व्यापाऱ्यांचा रोष लक्षात घेता मंगळवारी केंद्रीय वाणिज्य मंत्रालयाद्वारे ८५०० कोटींचे प्रोत्साहनपर अनुदान पॅकेज जाहीर करण्यात आले आहे. यावेळी सुरेश प्रभू म्हणाले, की निर्यातीला प्रोत्साहन देण्यासाठी किचकट प्रक्रिया सोपी करण्यात आली आहे. रोजहार पुरविणाऱ्या क्षेत्रांना शक्य ती मदत केली जाणार आहे. जीएसटीचे योग्य लाभ संबंधितांना दिले जातील.  निर्यात धोरण २०१५-१६ द्वारे कृषी, गालीचे, हस्तशिल्प आणि समुद्री उत्पादने क्षेत्राला निश्चितच लाभ मिळेल. तसेच यातून शेतकऱ्यांचे उत्पन्न दुप्पट करण्याच्या प्रयत्नालाही बळ मिळणार आहे. - सुरेश प्रभू, केंद्रीय वाणिज्य मंत्री