ग्रामनिधीत ५६ वर्षांत ११ कोटींचा अपहार

नाशिक  : ग्रामपंचायतीचा कारभार करताना सरपंच, ग्रामसेवकाने ग्रामनिधीच्या माध्यमातून गेल्या ५६ वर्षांपासून गावांना कसे लुटले हे नुकतेच समोर आले आहे. वेळोवेळी लेखापरीक्षणात ताशेरे ओढूनही ग्रामनिधीत ११ कोटींहून अधिक रुपयांचा अपहार झाला आहे. लुटीचा प्रकार आजही राजरोस सुरू आहे. अपहार प्रकरणात ६८० ग्रामसेवक, तर १२९ सरपंच दोषी आढळले आहेत, तर या प्रकरणातील ४६ ग्रामसेवक मृत झालेले आहेत. त्यामुळे त्यांनी केलेल्या अपहार रकमेची वसुली कशी होणार, हा प्रश्‍न आहे.

नाशिक जिल्ह्यात स्थानिक लेखा निधी शाखेने वेळोवेळी लेखापरीक्षण करून आक्षेप नोंदविलेले असताना त्याकडे दुर्लक्ष करून कोट्यवधी रुपयांच्या ग्रामनिधीचा अपहार जिल्ह्यातील ग्रामपंचायतींनी केल्याचे जिल्हा परिषदेचे मुख्य लेखा व वित्त विभाग आणि विभागीय महसूल आयुक्‍त कार्यालयाकडून निदर्शनास आले आहे. हा प्रकार १९६२ पासून सुरू असल्याचे व यामध्ये सुमारे ६८० ग्रामसेवक १२९ सरपंच दोषी असल्याचे आढळून आले आहे. त्यांच्यावर कारवाई केल्याचे ग्रामविकासमंत्री पंकजा मुंडे यांनी सांगितले आहे. 

या प्रकरणी आमदार अनिल कदम यांनी प्रश्‍न विचारला होता. त्या वेळी मंत्री मुंडे यांनी सभागृहात उत्तर दिले. निफाडचे आमदार अनिल कदम यांनी सभागृहात आठ कोटी ७३ लाख रुपयांचा ग्रामनिधी अपहाराबाबत प्रश्‍न विचारला होता.

त्यावर उत्तर देताना ग्रामविकासमंत्री पंकजा मुंडे यांनी ग्रामनिधी अपहाराची रक्‍कम ११ कोटींहून अधिक असल्याचे आणि  ग्रामनिधीच्या अपहाराची ४४६ प्रकरणे आढळली असल्याचे सभागृहात निवेदन केले. जुनी प्रकरणे असल्याने ग्रामसेवक व संबंधित मृत असल्याने वसुली रखडल्याची कबुलीही मुंडे यांनी दिली. नाशिक जिल्ह्यातील ग्रामनिधीच्या अपहाराच्या प्रकरणात ६८० ग्रामसेवक व १२९ सरपंच दोषी आढळून आले असल्याचे सांगत त्यांच्यावर कारवाई केली असल्याचेही उत्तरामध्ये नमूद केले आहे. 

जानेवारी २०१८ च्या अखेर ग्रामनिधीच्या एकूण ४४६ प्रकरणांपैकी २०० प्रकरणांतील दीड कोटीच्या आसपासची रक्‍कम संबंधितांकडून वसूल केली. ३५ प्रकरणांत पाऊण कोटी रकमेचे फौजदारी गुन्हे दाखल करण्यात आले, तर २० प्रकरणांमध्ये सुमारे ३७ लाख रुपये रकमेचा बोजा संबंधितांच्या मिळकतीवर चढवण्यात आला आहे.