सोलापूर जिल्हा बॅंकेच्या १८ शाखा बंद होणार

सोलापूर : सोलापूर जिल्हा मध्यवर्ती सहकारी बॅंकेच्या २५ शाखा गेल्या पाच वर्षांपासून तोट्यात आहेत. या शाखा बंद अथवा स्थलांतरित करण्याची सूचना नाबार्डच्या वतीने करण्यात आली आहे. पण त्यापैकी १८ शाखा दिवाळीनंतर तातडीने बंद करण्याचा निर्णय जिल्हा मध्यवर्ती बॅंकेने घेतला आहे.

आर्थिकदृष्ट्या तोट्यात असलेल्या या २५ शाखांमुळे सुमारे ४० कोटींचा तोटा बॅंकेला झाला आहे. हा तोटा पाहून नाबार्डने या शाखा बंद करण्याचा अथवा त्या अन्य ठिकाणी स्थलांतरित कराव्यात, अशी सूचना केली आहे. त्यानुसार बॅंकेने संतनाथ साखर कारखाना शाखा, राळेरास व सिद्धापूर शाखा बंद केल्या आहेत. देगाव येथील शाखेचे स्थलांतर केले आहे.

जिल्हा परिषद शाखा, एम. जी. रोड शाखा व वडवळ शाखा नाबार्डच्या नियामानुसार तोट्यात दिसत असल्या तरीही या शाखांमध्ये मोठ्या प्रमाणात ठेवी आहेत. या शाखांच्या माध्यमातून परिसरातील ग्राहकांना चांगल्या पद्धतीने सेवा दिली जात आहे. त्यामुळे या शाखा बंद करण्यात येणार नाहीत. पण उर्वरित १८ शाखा बंद करण्याचा निर्णय दिवाळीनंतर घेण्याचा निर्णय संचालक मंडळाने घेतला आहे.

या १८ शाखा बंद होणार बीबी दारफळ, औराद, आहेरवाडी, चळे, एकशिव, चाकोरे, बोरगाव, पांगरी, गौडगाव, पाथरी, नारी, खामगाव, काटेगाव, सुभाषनगर, मालवंडी, म्हैसगाव, चुंगी, सलगर (अ) या १८ शाखा बंद करण्यात येणार आहेत. पण त्यासाठी आणखी दोन महिन्यांची मुदत आहे. या कालावधीत काही सुधारणा झाल्यास फेरविचार होऊ शकतो, पण बॅंकेचा आर्थिक तोटा वाढत चालल्यास दोन महिन्यांनंतर शाखा बंद करण्यात येणार आहेत.