अॅग्री बिझनेस पदवीसाठी 'आयसीएआर'ची समिती

अॅग्री बिझनेस पदवीसाठी 'आयसीएआर'ची समिती
अॅग्री बिझनेस पदवीसाठी 'आयसीएआर'ची समिती

पुणे : देशातील कृषी व्यवसाय व्यवस्थापन पदवी अभ्यासक्रमाला मान्यता देण्यासाठी माजी कृषिमंत्री शरद पवार यांनी भारतीय कृषी संशोधन परिषदेकडे विद्यार्थ्यांची जोरदार बाजू मांडली आहे. याबाबत एक समिती नियुक्त करण्याचा निर्णय आता परिषदेने घेतला आहे.  

महाराष्ट्रातील चारही विद्यापीठांकडून कृषी व्यवसाय व्यवस्थापन (अॅग्री बिझनेस मॅनेजमेंट) पदवी अभ्यासक्रम शिकवला जातो. सध्या एक हजाराहून जास्त विद्यार्थी या अभ्यासक्रमासाठी शिक्षण घेत आहेत. भारतीय कृषी संशोधन परिषद अर्थात आयसीएआरने मात्र या अभ्यासक्रमाला व्यावसायिक सूचित समावेश करण्यास नकार दिला होता. 

भारतीय कृषी संशोधन संस्थेत (आयएआरआय) देखील अॅग्री बिझनेस मॅनेजमेंट पदवी अभ्यासक्रम शिकवला जातो. याशिवाय पाच राज्यांमध्ये विविध नावाने हा अभ्यासक्रम चालू असताना आयसीएआरने व्यावसायिक सूचीत या अभ्यासक्रमाचा समावेश न करणे चुकीचे आहे, असा मुद्दा श्री. पवार यांनी मांडला आहे. आयसीएआरचे महासंचालक डॉ. त्रिलोचन महापात्रा यांच्याशी प्रत्यक्ष झालेल्या चर्चेत श्री. पवार यांनी विद्यार्थ्यांची बाजू प्रभावीपणे मांडली.

अॅग्री बिझनेस मॅनेजमेंट पदवीबाबत श्री. पवार यांनी लक्ष वेधल्यानंतर आता कृषिमंत्री पांडुरंग फुंडकर यांनीदेखील आयसीएआरला पत्र लिहून मान्यता देण्याची विनंती केली आहे. "आयसीएआरने श्री. पवार यांच्या मुद्यांची दखल घेतली असून, एक समिती स्थापन केली आहे. या समितीचा अहवाल आयसीएआरच्या महासभेत मांडला जाईल व अॅग्री बिझनेस पदवीला मान्यता मिळेल," अशी माहिती सूत्रांनी दिली.

कृषी तंत्रनिकेतनच्या विद्यार्थ्यांसाठी पाठपुरावा सुरूच  माजी कृषिमंत्री शरद पवार यांच्याकडून राज्यातील कृषी तंत्रनिकेतनच्या विद्यार्थ्यांसाठी अजूनही पाठपुरावा सुरू असल्याचे स्पष्ट झाले आहे. तंत्रनिकेतनच्या विद्यार्थ्यांना कृषी पदवीच्या दुसऱ्या वर्षासाठी प्रवेश न देण्याच्या निर्णयाविरुद्ध संतप्त विद्यार्थ्यांनी काही महिन्यांपूर्वी श्री. पवार यांची भेट घेतली होती. कृषिमंत्री श्री. फुंडकर यांच्याशी संपर्क साधून मुलांच्या बाजूने तुम्ही भूमिका घ्या, असा आग्रह श्री. पवार यांनी धरला होता. "विद्यार्थ्यांच्या या प्रश्नासाठी श्री. पवार यांच्यामुळे आता राज्यपाल, कृषिमंत्री व विद्यापीठांमध्ये बैठका होणार असून मार्ग निघण्याची आशा आहे, अशी माहिती सूत्रांनी दिली.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com