नगर येथे ‘अॅग्रोवन कृषी प्रदर्शना’स उत्साहात प्रारंभ

नगर : नगर आणि शेजारच्या जिल्ह्यातील शेतकऱ्यांसह नगरकरांना उत्सुकता असलेल्या ‘सकाळ-अॅग्रोवन’च्या कृषी प्रदर्शनास शुक्रवारी (ता. २३) येथील जॉगिंग पार्क मैदानावर उत्साहात प्रारंभ झाला. पहिल्याच दिवसापासून शेतकऱ्यांचा प्रदर्शनाला मोठा प्रतिसाद मिळत आहे. येथे उपलब्ध असलेल्या स्टॉलमधून शेतकरी विविध विषयांबाबत मार्गदर्शन घेत आहेत.

शेतीच्या आधुनिक तंत्रज्ञानाची सखोल माहिती ‘सकाळ-अॅग्रोवन’च्या माध्यमातून शेतकऱ्यांना मिळत आहे. त्यामुळे शेतकरी नवीन तंत्रज्ञानाचा वापर करू लागले आहेत. पारंपरिक पद्धतीला फाटा देत नवीन तंत्रज्ञान अत्मसात करून शेती करीत आहे, असे मत केंद्रीय वस्तू व सेवाकर खात्याचे सहायक आयुक्त डॉ. गणेश पोटे यांनी या वेळी व्यक्त केले. 

जिल्हा अधीक्षक कृषी अधिकारी पंडित लोणारे म्हणाले, की पूर्वी शेतीची माहिती मिळत नव्हती. त्यामुळे पारंपरिक पद्धतीने शेती केली जात होती; परंतु ‘अॅग्रोवन’च्या माध्यमातून आधुनिक शेतीची माहिती सहजपणे उपलब्ध झाली आहे. कृषी प्रदर्शनातून शेतकऱ्यांना नवीन तंत्रज्ञानाची माहिती मिळणार आहे. 

‘सकाळ’चे निवासी संपादक अॅड. डॉ. बाळ ज. बोठे पाटील म्हणाले, की ‘सकाळ-अॅग्रोवन’चे काम केवळ बातम्यांपुरते सीमित नाही, तर शेतकरी हितासाठी सतत काम सुरू आहे. सकाळ सोशल फाउंडेशनच्या माध्यमातून सिंचनाची कामे केली. त्याचा शेतीला मोठा फायदा होत आहे. 

‘कन्हैया अॅग्रो’चे कार्यकारी संचालक सुरेश पठारे म्हणाले, की आतापर्यंत ग्रामीण भागाला फारसे मार्गदर्शन मिळायचे नाही. आता मात्र ‘अॅग्रोवन’चे कृषी प्रदर्शन चांगली माहिती देत आहे. दूध व्यवसायवाढीला यामुळे मोठा फायदा होणार आहे. 

चितळे डेअरीचे विस्तार अधिकारी चंद्रशेखर कुलकर्णी म्हणाले, की ‘अॅग्रोवन’ शेती-मातीचा खरा मार्गदर्शक आहे. शेतकऱ्यांना दूध व्यवसाय सुरू करण्यापूर्वी त्यासाठी लागणाऱ्या बाबींची माहिती ‘अॅग्रोवन’कडून मिळते ही आनंदाची बाब आहे. येथे आम्ही मुरघास, तंत्रज्ञानाची माहिती देत आहोत.