पुणे ः जिल्हा परिषदेच्या कृषी विभागातर्फे शेतकऱ्यांना वैयक्तिक लाभासाठी देण्यात येणाऱ्या वस्तूमध्ये बदल करण्याचा निर्णय घेण्यात आला आहे. यापुढे शेतकऱ्यांच्या मागणाीनुसार अनुदानावर सुधारित कृषी अवजारे आणि साहित्याचा पुरवठा करण्यात येणार असल्याची माहिती जिल्हा परिषदेच्या कृषी व पशुसंवर्धन विभागाच्या सभापती सुजाता पवार यांनी दिली.
पवार म्हणाल्या, वैयक्तिक लाभाच्या योजनांमधून शेतकऱ्यांना वर्षानुवर्षे पाइप, ताडपत्री, मोटार, कडबाकुट्टी याच साहित्याचा पुरवठा करण्यात येतो. मुळशी भागात ताडपत्रीला तर जुन्नर, अांबेगाव, खेड तालुक्यांत सायकल कोळपे यंत्राला मागणी असते. इतर भागात या अवजारांना मागणी नसल्याने जिल्ह्याच्या सर्व भागांसाठी सर्रास योजना राबवून उपयोग नाही.
एखाद्या ठराविक वस्तूसाठी तरतूद केल्यास त्याची आवश्‍यकता नसली तरी वस्तू घेतली जाते. त्यासाठी तालुकास्तरावर साखळी कार्यरत असल्याने ठराविक लोक योजनेचा लाभ घेतात. त्यामुळे लाभार्थी निवडताना अडचणी येत असून, गरजू लाभार्थी वंचित राहतो. काही वस्तूंना मागणी नसली तरी त्यासाठी तरतूद असल्यामुळे त्याच वस्तू शेतकऱ्यांना द्याव्या लागतात.
यापुढे त्यात बदल करण्याचा निर्णय घेण्यात आला असून, मागणी तसा पुरवठा असावा अशी भूमिका आहे. त्यामुळे तालुकानिहाय आवश्‍यक असलेल्या कृषी अवजारे, साहित्यांची मागणी करण्याचा निर्णय शेतकऱ्यांना घेता येणार आहे. कडबाकुट्टी यंत्राचा पुरवठा योजना कृषी, पशुसंवर्धन, समाजकल्याण या तीन विभागांमार्फत राबविण्यात येते. निधीचे विभाजन टाळण्यासाठी अशा साहित्य वाटपाच्या योजना एकाच विभागामार्फत राबवाव्यात, असेही नियोजन करण्यात येत अाहे. लाभार्थ्यांनी जिल्हा परिषदेकडे पत्रव्यवहार करावा, आवश्‍यक अवजारे, साहित्याविषयी माहिती कळवावी, त्यानुसार नवीन वर्षामध्ये योजनांमध्ये बदल करता येईल, असेही सुजाता पवार यांनी सांगितले.
५ कोटी ४० लाखांची तरतूद शेतकऱ्यांना ७५ टक्के अनुदानातून देण्यात येणारे प्लॅस्टिक क्रेट, कडबाकुट्टी यंत्र, ताडपत्री, पीक संरक्षक अवजारे, सिंचनासाठी पीव्हीसी पाइप, तणनाशक औषधे, आॅईल पंप संच, इलेक्ट्रिक मोटार आदी साहित्य वाटपासह ठिबक सिंचन प्रोत्साहन, शेतकरी समूह, बचत गटांना फवारणी यंत्रासाठी फिरता निधी, ५० टक्के अनुदानावर मोती शेती प्रक्रिया आदी योजनांसाठी असलेली तरतूद यंदाच्या अर्थसंकल्पात रद्द करण्यात आली आहे. त्याऐवजी शेतकऱ्यांना त्यांच्या मागणीनुसार ७५ टक्के अनुदानातून सुधारित अवजारे आणि साहित्याचा पुरवठा करण्यासाठी सुमारे पाच कोटी चाळीस लाख रुपयांची तरतूद करण्यात आली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.