कृषी पदविकाधारकांच्या थेट प्रवेशाच्या निर्णयावर वरवंटा

बारामती, जि. पुणे : सरकारने मोठा गाजावाजा करत कृषी पदवीसाठी थेट दुसऱ्या वर्षात प्रवेश दिलेल्या विद्यार्थ्यांना सरकारच्याच एका आदेशानुसार आता पहिल्या वर्षाचे ११ पेपर सोडविल्याशिवाय पदवी मिळणार नाही, असे स्पष्ट केल्याने शेवटच्या वर्षाचे पेपर देण्याची तयारी केलेल्या राज्यातील १० हजार विद्यार्थ्यांच्या डोक्यावर आता पुन्हा पहिल्या वर्षाचे ओझे आले आहे. विशेष म्हणजे सरकारी यंत्रणेपासून ते प्रशासकीय यंत्रणेपर्यंत सर्वांनी हात वर केल्याने आता कोणाकडे दाद मागायची, असा प्रश्न विद्यार्थ्यांपुढे निर्माण झाला आहे.  कृषी पदवीच्या शेवटच्या वर्षात शिकणाऱ्या विद्यार्थ्यांचे कृषी शिक्षण व संशोधनाच्या नियमानुसार १६३ श्रेयांक भारांक होत नसल्याने कृषी शिक्षण व संशोधन परिषदेने थेट दुसऱ्या वर्षात प्रवेश देण्याच्या सवलतीवर ‘वरवंटा’ फिरवला आहे. २०१२ मध्ये राज्य सरकारने राज्यातील चारही कृषी विद्यापीठांतर्गत असलेल्या कृषी तंत्रनिकेतन पदविकाधारकांना कृषी पदवी अभ्यासक्रमाच्या थेट दुसऱ्या वर्षात प्रवेश देण्याची तरतूद केली होती. राज्यभरातील कृषी महाविद्यालयांनी त्यानुसार अंमलबजावणी करत प्रवेश दिले; मात्र कृषी पदवी अभ्यासक्रम हा चार वर्षांचा असून, या वर्षात विद्यार्थ्यांचे १६३ क्रेडिट लोड (श्रेयांक भारांक) पूर्ण होणे आवश्यक असतात. पहिल्या वर्षाची सवलत दिल्याने हे भारांक पूर्ण होत नाहीत, असा चार वर्षांनंतर परिषदेने शोध लावला आणि पहिल्या वर्षाचे पेपर न सोडविल्याने हे भारांक पूर्ण होत नसल्याने पहिल्या वर्षाचे सर्व पेपर सोडवा, असा आदेश नव्याने दिला आहे. 

धक्कादायक म्हणजे, राज्यातील १० हजार विद्यार्थी असे आहेत, की ज्यांना थेट दुसऱ्या वर्षात प्रवेश मिळाला आणि ते आता शेवटच्या वर्षातील दुसऱ्या सत्रात कार्यानुभवाचा अनुभव घेत आहेत. त्यांच्यापैकी काहींना तिसऱ्या वर्षातील काही पेपर अद्याप द्यायचे आहेत. थोडक्यात तिसऱ्या वर्षाचे काही पेपर, चौथ्या वर्षातील संपूर्ण अभ्यासक्रम व पहिल्या वर्षाचा संपूर्ण अभ्यासक्रम असे सर्व पेपर द्यावे लागतील, त्यामुळे हे विद्यार्थी हवालदिल झाले आहेत. 

आदेश पोचलेच नाहीत...  माजी केंद्रीय कृषिमंत्री शरद पवार, कृषिमंत्री पांडुरंग फुंडकर यांनाही विद्यार्थी भेटले. फुंडकर यांनी यासंदर्भात कृषी संशोधन परिषदेच्या संचालकांना सूचना केल्याची माहिती दिली; मात्र संबंधित संचालकांपर्यंत अजून कसलेच आदेश पोचले नसल्याने पदवी मिळण्याच्या प्रतीक्षेत असलेले विद्यार्थी चांगलेच हादरलेले आहेत.