उन्नत शेती समृद्ध शेती योजनेत जीएसटीचा भूर्दंड शेतकऱ्यांच्या माथी

कोल्हापूर : उन्नत शेती समृद्ध शेती योजनेअंतर्गत अवजारांवर देण्यात येणारे अनुदान जीएसटी (सेवा आणि वस्तू कर) वगळूनच शेतकऱ्याला देण्यात यावे या नियमातील तरतुदीमुळे योजनेतील लाभार्थी शेतकऱ्यांच्या माथ्यावर जीएसटीचा थेट भुर्दंड बसला आहे. अनुदान देताना अवजाराची मूळ किंमतच गृहीत धरून अनुदान जमा होत आहे. यामुळे अनुदान देतानाही जीएसटी वगळून देत असल्याने शासन मखलाशी करत असल्याचा आरोप शेतकऱ्यांचा आहे.

मूळ किंमत धरूनच अनुदान जमा करण्यात आले आहे. हे अनुदान जमा करताना त्यावरील जीएसटीची रक्कम शेतकऱ्यांच्या माथी मारल्याने यात शेतकऱ्याला फटका बसत आहे. या सगळ्या खेळात लाभार्थी शेतकऱ्यांच्या खिशातून जादा पैसे जाणार असल्याने शेतकऱ्यांतून संतप्त प्रतिक्रिया व्यक्त होत आहेत.

उन्नत शेती समृद्ध शेती योजनेअंतर्गत यांत्रिकीकरणासाठी प्राप्त होणाऱ्या निधीपैकी ट्रॅक्‍टरकरिता चाळीस टक्के व इतर अवजारांकरिता साठ टक्के निधी उपलब्ध करून देण्यात आला आहे. याकरिता सोडतीद्वारे शेतकऱ्यांची निवड करण्यात आली आहे. कृषी विभागाची पूर्वसंमती घेतल्यानंतर लाभार्थी शेतकऱ्यांनी संबंधित अवजार खरेदी करून त्याची पावती कृषी विभागास सादर करावी. या पावतीच्या आधारे अवजारानुसार हे अनुदान शेतकऱ्याच्या खात्यात जमा करावे असा या योजनेचा नियम आहे. 

कृषी आयुक्तालयाने डिसेंबरच्या शेवटच्या आठवड्यात याबबातचे एक पत्र राज्यातील कृषी कार्यालयांना पाठवले आहे. यामध्ये अनुदान जमा करताना करविरहीत रकमेचा विचार होऊन यानुसार अनुदान जमा करावे, असा स्पष्ट आदेश देण्यात आला आहे. या मोहिमेअंतर्गत अनुदान देय असणाऱ्या सर्व योजनांमध्ये अशीच कार्यवाही करण्याच्या सूचनाही या पत्रात आहेत.