'जिल्हा परिषदेत निधीचे सदस्यांना समान वाटप करा'

नगर : जिल्हा परिषद निवडणुकीला तेरा महिने होऊनही गेले, मात्र अजून एकाही जिल्हा परिषद सदस्याला त्यांच्या गटात विकासकाम करता आले नाही. आता हाती घेतलेली कामेही ठराविक गटातच आहेत. काही सदस्यांना कामाबाबत डावलले जात असल्याचा आरोप भाजपचे गटनेते जालिंदर वाकचौरे यांनी केला. जिल्हा परिषदेत पदाधिकाऱ्यांनी सहली काढण्यापेक्षा विकासकामांचे विकेंद्रीकरण करणे गरजेचे असल्याचे ते म्हणाले. 

वाकचौरे म्हणाले, जिल्हा परिषदेत निवडून आलेल्या प्रत्येक सदस्यांकडून गटातील मतदारांना कामाची अपेक्षा असते. जिल्हा परिषदेत मात्र ठराविक गटातच विकासकामांना कोट्यवधी रुपयांची प्रशासकीय मान्यता देत आहेत. पदाधिकारी म्हणून इतरांपेक्षा थोडी जास्त कामे घेतली तर हरकत नाही; परंतु काही सदस्यांना एक रस्ता, चार हायमॅक्‍स एवढा निधी, मात्र पदाधिकारी यांना कोट्यवधींची कामे असा दुजाभाव सध्या जिल्हा परिषदमध्ये चालू आहे. रस्ते, पर्यटन, बंधारे दुरुस्ती आदी कामांसाठी कोट्यवधी रुपये निधी दिला जातो, इतर सदस्यांना मात्र निधीपासून वंचित ठेवले जात आहे. भाजप सदस्यांशी दुजाभाव केला जाता असल्याचा आरोप वाकचौरे यांनी केला. 

आता जिल्हा परिषद पदाधिकारी, सदस्य तेलंगणा राज्यातील योजना पाहण्यासाठी सहलीला जाणार आहेत. याआधी जयपूरला विमानाने सहलीला जाऊन आले. खरं तर सहलीपेक्षा विकासकामांना प्राधान्य देण्याची गरज आहे. त्याचा किती उपयोग या जिल्हा परिषदेला व जिल्ह्यातील लोकांना झाला हा खरा प्रश्न आहे. त्यापेक्षा तो खर्च विकासकामांवर केला तर त्याचा सदुपयोग होईल. गेल्या वर्षी ४९ कोटी अखर्चित निधी परत गेला, त्या अधिकाऱ्यावर कारवाई करण्याऐवजी त्यांना वापरासाठी नव्या गाड्यांची भेट दिली. या वर्षी ५० कोटींच्या वर निधी परत जाणार आहे. निधी परत गेल्यास अधिकाऱ्यांवर कारवाई करावी, असे वाकचौरे म्हणाले.