अंजनगावसुर्जी बाजार समितीत तुरीची हेराफेरी

अमरावती  ः सॅम्पलच्या नावाखाली शेतकऱ्यांच्या मालातील एक ते दोन किलो तूर काढत घरी नेण्याचा धक्‍कादायक प्रकार अंजनगावसुर्जी बाजार समितीत उघडकीस आला आहे. याप्रकरणी पोलिसांनी बाजार समिती सचिव, खरेदी विक्री व्यवस्थापकासह ग्रेडर विरोधात गुन्हा दाखल केला.

अंजनगावसुर्जी बाजार समितीत प्रशांत सुरेश बहाकर नामक ग्रेडर शेतकऱ्यांच्या तुरीची प्रतवारी (सॅम्पल) तपासण्याच्या नावाखाली एक ते दोन किलो तूर काढून घेत होता. हा गैरप्रकार करण्यासाठी ग्रेडरला खरेदी विक्रीचे व्यवस्थापक मधुकर बोंद्रे व बाजार समिती सचिव गजानन नवघरे यांचे सहकार्य मिळत असल्याची बाब शेतकऱ्यांच्या निदर्शनास आली. मात्र तक्रार केल्यास आपलीच तूर घेण्यासाठी नकार मिळेल, या भीतीपोटी कोणीही शेतकरी तक्रारीसाठी धजावत नव्हता. 

शेतकऱ्यांच्या याच मानसिकतेचा फायदा घेत तिघांनी संगनमताने शेतकऱ्यांच्या लुटीचे सत्र सुरूच ठेवले. दरम्यान याप्रकरणाची वाच्यता होऊ लागली. काही शेतकऱ्यांनी हा प्रकार उपविभागीय पोलिस अधिकारी सुनील जायभाये यांना कळविला. त्यांनी गुप्त पाळत ठेवली असता १५ मार्चला ग्रेडर बहाकार यास तुरीचे एक पोते नेताना पकडण्यात आले. त्यानंतर जवळपास १५ शेतकऱ्यांनी पोलिसांत याविषयीची तक्रार दिली. 

पोलिस चौकशीत आढळले तथ्य ठाणेदार सुधीर पाटील, सहायक पोलिस निरीक्षक जमील शेख यांनी याप्रकरणी चौकशी केली. त्यात एखाद्या व्यक्‍तीने विश्‍वासाने दिलेल्या वस्तूचा अपहार केल्याचे सिद्ध झाल्याने बाजार समिती सचिव, खरेदी विक्री व्यवस्थापक तसेच ग्रेडर विरोधात गुन्हा दाखल करण्यात आला.