संतप्त कीड सर्वेक्षकांचे आयुक्तालयासमोर धरणे

पुणे  : गैरव्यवहाराच्या आरोपात अडकलेल्या कीडरोग सर्वेक्षण व सल्ला प्रकल्पातील सर्वेक्षकांनी गुरुवारी भर उन्हात कृषी आयुक्तालावर मोर्चा काढला. मात्र, निवेदन स्वीकारण्यास कोणाही पुढे न आल्यामुळे संतप्त मोर्चेकऱ्यांनी जोरदार घोषणाबाजी करीत धरणे आंदोलन सुरू केले.   

क्रॉपसॅपमधील बहुतेक सर्वेक्षक हे शेतकरी कुटुंबांतील बेरोजगार युवक आहेत. अधिकाऱ्यांच्या संगनमताने गेल्या काही वर्षांपासून क्रॉपसॅपमधील ठेकेदार या सर्वेक्षकांचे आर्थिक शोषण करीत आहेत. या सर्वेक्षकांच्या वेतन व भविष्य निर्वाह निधीच्या रकमा ठेकेदारांकडून परस्पर वापरल्याच्या तक्रारी आहेत. मात्र, अद्याप कोणावरही कारवाई केलेली नाही. 

महाराष्ट्र राज्य तांत्रिक कीडरोग सर्वेक्षक संघटनेचे अध्यक्ष यशवंतराव शेंडगे म्हणाले, की २००९ पासून आम्ही राज्यातील सोयाबीन, कापूस, तूर, हरभरा, भात व फळपिकांच्या सर्वेक्षणाचे कष्टपूर्वक काम करतो आहे. आमच्यामुळे राज्याला ई गव्हर्नन्सचा राष्ट्रीय पुरस्कार मिळाला. आम्हाला कायमस्वरूपी नोकरीवर घेण्याचे खोटे आश्वासन देण्यात आले असून, ठेकेदार आमची लूट करीत आहेत. कृषी आयुक्तालयदेखील ही उघड्या डोळ्यांनी पाहात आहे. 

दरम्यान, दुपारी कृषी आयुक्त सच्चिंद्र प्रताप सिंह यांची आस्थेने चौकशी केली. "कीड सर्वेक्षकांना कामावरून काढले जाणार नाही. तुम्ही शासनाकडे तुमच्या मागण्या मांडाव्यात. आम्हीदेखील तुमच्या समस्या शासनाकडे पाठवू," असे आश्वासन आयुक्तांनी दिल्यामुळे कीड सर्वेक्षकांनी आंदोलन मागे घेतले.