पशुधन महामंडळाच्या मुख्यालयाचे स्थलांतर चिघळणार

अकोला  ः सध्या अकोल्यात असलेले महाराष्ट्र पशुधन विकास महामंडळाचे राज्याचे मुख्यालय अकोल्यातून नागपूर किंवा पुणे येथे हलविण्याच्या हालचाली सुरू झाल्या. याबाबतचे वृत्त प्रकाशित झाल्यानंतर हे कार्यालय अकोल्यातून दुसरीकडे कुठेही हलविण्यास विविध संघटनांनी विरोध सुरू केला आहे. याचाच एक भाग म्हणून सोमवारी (ता. १६) काही संघटनांच्या कार्यकर्त्यांनी कार्यालयात ठिय्या दिला. यानंतर आमदार रणधीर सावरकर यांनी भेट देत कार्यालय हटवू देणार नसल्याची भूमिका जाहीर केली.

अनेक वर्षांपासून अकोल्यात सुरू असलेले महाराष्ट्र पशुधन विकास महामंडळाचा कारभार पुण्यातूनच अधिक चालविला जातो. येथे केवळ नावापुरतेच मुख्यालय ठेवण्यात आलेले असून, जाणीवपूर्वक कार्यालयाचा कारभार ढेपाळण्यात आल्याचा संशयसुद्धा वारंवार व्यक्त केल्या गेला. शिवाय हे कार्यालय सुरवातीला पुण्यात नेण्याबाबत हालचाली झाल्या होत्या. आता मुख्यमंत्री कार्यालयाच्या पत्रव्यवहारावरून हे कार्यालय नागपूर नेण्यासाठी जोरदार लॉबिंग केले जात आहे. खुद्द केंद्रीय मंत्री नितीन गडकरी यांनी या कार्यालयाबाबत मुख्यमंत्र्यांना पत्र लिहिले आहे.

एकूणच या घडामोडी पाहता आता स्थानिकांमधून विरोध सुरू झाला. भाजपच्या मंत्र्यांनी कार्यालय नागपुरात नेण्यावरून पत्रव्यवहार केला असल्याने स्थानिक भाजप नेतृत्वाची गोची झाल्याचेही दिसून येते. आता शिवसंग्राम संघटना, संभाजी ब्रिगेड, राष्ट्रीय समाज पक्ष, समर्थ संघटना आदींनी स्थलांतराला विरोध दर्शवित सोमवारी दुपारी ठिय्या आंदोलन केले. या आंदोलनामुळे आता राजकीय नेतृत्वांचा पेच होऊ लागला. शिवसंग्रामचे विदर्भ अध्यक्ष शिवा मोहोड यांच्या नेतृत्वात झालेल्या आंदोलनात शेकडो कार्यकर्ते उपस्थित होते.