सोलापूर जिल्ह्यात खरिपासाठी ४१ टक्के कर्जवाटप

पीककर्ज वाटप
पीककर्ज वाटप

सोलापूर : जिल्ह्यात खरीप हंगामासाठी गेल्या वर्षी एक हजार १२ कोटी रुपयांचे कर्जवाटप झाले होते. यंदा मात्र ६५१ कोटी रुपयांचे वाटप झाले आहे. गतवर्षीच्या तुलनेत केवळ ४०.९७ टक्के एवढेच कर्जवाटप झाले आहे. खरीप हंगामासाठी कर्जवाटपाची मुदत सप्टेंबरअखेर आहे. तोपर्यंत ५० टक्के तरी कर्जपुरवठा होईल का, याबाबत साशंकता आहे.

यंदा खरीप हंगामात ४७ हजार ७०८ शेतकऱ्यांना ६५१ कोटींचे वाटप करण्यात आले आहे. त्यामध्ये जिल्हा बॅंकेने १२६ कोटी, ग्रामीण बॅंकेने ९६ कोटी, राष्ट्रीयीकृत व व्यापारी बॅंकांनी ५०९ कोटी रुपयांचे पीककर्जवाटप केले आहे. या कर्जवाटपात जुन्याच खातेदारांना कर्जवाटप झालेले आहे. नवीन सभासदांना पीककर्ज देण्यात सर्वच बॅंकांनी दुर्लक्ष केल्याचे दिसते.

या हंगामासाठी जिल्ह्यातून केवळ ९४ नवीन शेतकरी सभासदांना ७ कोटी ६२ लाखांचे कर्जवाटप झाले आहे. त्यात राष्ट्रीयीकृत व व्यापारी बॅंकेकडील ५२ आणि ग्रामीण बॅंकेकडील ४२ शेतकऱ्यांचा समावेश आहे. जिल्हा बॅंकेकडून मात्र एकाही नव्या शेतकरी सभासदाला कर्जवाटप करण्यात आलेले नाही. त्यातच आता सप्टेंबरअखेर खरिपाच्या कर्जवाटपासाठी मुदत आहे, अवघ्या पंधरवड्यात कर्जवाटप किती होणार, याबाबत साशंकता आहे.

राज्य शासनाने कर्जमाफीची घोषणा करताना या हंगामासाठी तातडीच्या कर्जाकरिता १० हजार रुपयांपर्यंतचे कर्ज देण्याचे आश्‍वासन दिले होते; पण या निर्णयानुसार जिल्ह्यातील केवळ ७५१ शेतकऱ्यांना १० हजारांचे कर्ज मिळाले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com