राज्याचे गाळप ९५० लाख टनांपर्यंत जाणार

पुणे : राज्यातील साखर कारखान्यांनी उसाचे गाळप वेगाने पूर्ण करण्यासाठी कंबर कसली आहे. भरमसाठ ऊस उपलब्ध झाल्यामुळे यंदा एकूण गाळप साडेनऊशे लाख टनाच्या आसपास राहील, असा नवा अंदाज साखर आयुक्तालयातील सूत्रांनी व्यक्त केला आहे.  

साखर आयुक्तालयाकडे उसाची उपलब्धता निश्चित करणारी स्वतःची कोणतीही यंत्रणा नाही. साखर कारखान्यांकडून लागवडीची मिळणारी माहितीदेखील बेभरवशाची असते. त्यामुळे सरकारकडून कृषी विभागाच्या आकडेवारीनुसारच राज्यातील उसाची उपलब्धता निश्चित केली जाते. 

कृषी विभागाच्या आकडेवारीनुसार यंदा राज्यात ६५० लाख टन ऊस उपलब्ध राहण्याची शक्यता सांगितली गेली. त्यानंतर आकडेवारीत पुन्हा सुधारणा करून ७५० लाख टनाच्यावर ऊस असल्याचे सांगितले गेले होते. गेल्या महिन्यात गाळप सातशे लाख टनाच्या पुढे गेल्यामुळे सुधारित आकडाही चुकीचा निघाला. 

“राज्यातील सर्व साखर कारखान्यांकडून आम्ही माहिती मागवली असता उसाची उपलब्धता ९५० लाख टनाच्या आसपास असल्याचे स्पष्ट झाले आहे. यंदा १८७ साखर कारखान्यांपैकी आतापर्यंत केवळ ४२ कारखाने बंद झालेले आहेत. जादा उसामुळे यंदा एप्रिलच्या दुसऱ्या आठवड्यापर्यंत ८० टक्के कारखाने सुरू राहतील. काही कारखाने मेपर्यंत चालणार असल्यामुळे यंदा विक्रमी गाळप होईल, अशी माहिती सूत्रांनी दिली.

उसाची भरपूर उपलब्धता असल्यामुळे राज्यातील कारखान्यांनी आतापर्यंत ९७ लाख ३७ हजार टन साखर तयार केली आहे. उतारा ११.१२ टक्के मिळत असून मेपर्यंत एकूण साखर उत्पादन १०६ लाख टनाच्या आसपास जाईल. त्यामुळे बाजारपेठेत भरपूर साखर उपलब्ध राहील. परिणाम भावदेखील दबावाखाली असतील, असे साखर उद्योगाचे म्हणणे आहे. अजून किमान ७५ लाख टन ऊस तोडणीच्या प्रतीक्षेत आहे. कारखान्यांकडून होत असलेल्या तोडी आणि गाळपाचे एकूण नियोजन बघता तोडी अभावी कोणत्याही शेतकऱ्याचा ऊस जळणार नाही, असा दावा सहकार विभागाकडून केला जात आहे.