हरभरा पीक प्रात्यक्षिकातून धुळ्याला वगळले

धुळे : राष्ट्रीय अन्न सुरक्षा अभियानांतर्गत राबविण्यात येणाऱ्या हरभरा पीक प्रात्यक्षिकातून धुळे जिल्ह्यास यंदा वगळण्यात आले आहे. राज्यातील जळगावसह इतर जिल्ह्यांमध्ये हा पीक प्रात्यक्षिक कार्यक्रम राबविला आहे, पण धुळ्यालाच का वगळले, असा प्रश्‍न शेतकरी उपस्थित करत आहेत.  

२०११-१२ पासून धुळे जिल्ह्यात रब्बी पीक प्रात्यक्षिकांतर्गत हरभऱ्यासंबंधी अनुदान दिले जात होते. १७०० हेक्‍टर क्षेत्रासाठी हा कार्यक्रम मंजूर होता. त्यासाठी हेक्‍टरी सात हजार ५०० रुपये अनुदान दिले जायचे. जिल्ह्यास एकूण एक कोटी २७ लाख ५० हजार रुपये अनुदान मिळायचे. परंतु, यावर्षीच्या रब्बी हंगामासंबंधीच्या पीक प्रात्यक्षिक कार्यक्रमातून धुळे जिल्ह्याला वगळण्यात आले. याचा फटका शेतकऱ्यांना बसला आहे. 

जवळपास चार ते पाच हजार शेतकरी या पीक प्रात्यक्षिक कार्यक्रमात सहभागी होऊन हरभऱ्याचे अधिकाधिक उत्पादन घ्यायचे. यंदा हरभऱ्या व्यतिरिक्त गहू, ज्वारी या पिकांसाठीही पीक प्रात्यक्षिके जिल्ह्यात दिलेली नाहीत. हा धुळे जिल्ह्यावर अन्याय असल्याचे धुळे जिल्हा शेतकरी उत्पादक कंपनी महासंघाने म्हटले असून, यासंदर्भात कृषी आयुक्त यांना निवेदन सादर केले आहे. 

रब्बी ज्वारी पीक प्रात्यक्षिकेही नाहीत राज्यात आठ जिल्ह्यांमध्ये रब्बी ज्वारीसंबंधीची पीक प्रात्यक्षिके असतात. राज्यात ६४ हजार हेक्‍टवर हा कार्यक्रम असतो, पण या कार्यक्रमातही धुळे जिल्ह्यास सहभागी करून घेतले नाही. यासंदर्भातही कृषी आयुक्तालयाकडे मध्यंतरी मागणी केली होती. परंतु, ही मागणीदेखील दुर्लक्षित आहे. ही बाब धुळे जिल्ह्याच्या दृष्टीने कृषी विकासाला खीळ बसविणारी आहे. कृषी विभागाने शेतकऱ्यांच्या मागणीची दखल घ्यावी, अशी अपेक्षा शेतकरी उत्पादक कंपनी महासंघाने व्यक्त केली आहे.