आमच्या नादाला लागू नका : अॅड. प्रकाश आंबेडकर

मुंबई : ‘आमच्या नादाला लागू नका’ असा इशारा देतानाच संभाजी भिडे यांना मुख्यमंत्री देवेंद्र फडणवीस आणि पंतप्रधान मोदी पाठीशी घालत आहेत, असा थेट आरोप भारिप बहुजन महासंघाचे नेते अॅड. प्रकाश आंबेडकर यांनी मुंबईत केला.

संभाजी भिडे यांना अटक करावी, या मागणीसाठी सोमवारी (ता. २६) विधानसभेवर एल्गार मोर्चा काढण्यात आला. या मोर्चात महाराष्ट्राच्या कानाकोपऱ्यातून आलेले कार्यकर्ते सहभागी झाले होते. या मोर्चासमोर अतिशय जोशपूर्ण भाषण करताना अॅड. आंबेडकर यांनी मोदी आणि फडणवीस सरकारवर कडाडून हल्ला चढविला. ते म्हणाले, की देशात हुकूमशाही चालू देणार नाही. आमच्या नादाला लागू नका, असे स्पष्ट करतानाच हिटलरने देखील आत्महत्या केली होती, याकडेही त्यांनी लक्ष वेधले. 

अॅड. आंबेडकर यांनी टीका करतानाच संभाजी भिडेंना पाठीशी घालू नये, आठ दिवसांत अटक करा, अन्यथा सरकारने याचे गंभीर परिणाम भोगायला तयार राहावे, असा इशाराही त्यांनी दिला. मोर्चा जिजामाता उद्यान ते विधान भवनदरम्यान काढण्यात आला असून, एल्गार मोर्चाला पोलिसांनी परवानगी नाकारली होती.

एल्गार परिषदेचे विधानसभेत पडसाद कोरेगाव-भीमाप्रकरणातील संभाजी भिडे पत्रकार परिषदा घेत आहेत. मात्र राज्य सरकारला ते सापडत नाहीत. यावरून राज्य सरकार भिडेंना पाठीशी घालत असल्याचा आरोप विरोधी पक्षनेते राधाकृष्ण विखे-पाटील यांनी विधानसभेत केला. कोरेगाव-भीमाप्रकरणी विरोधी पक्षनेते राधाकृष्ण विखे-पाटील आणि राष्ट्रवादीचे जितेंद्र आव्हाड यांनी स्थगन प्रस्ताव मांडला होता.