कर्जमाफी प्रक्रियेत दहा लाख बोगस अर्ज : चंद्रकांत पाटील

कोल्हापूर  : कर्जमाफीचा लाभ घेऊ इछिणाऱ्यांमध्ये दहा लाख बनावट अर्ज आल्याचे पालकमंत्री चंद्रकांत पाटील यांनी सोमवारी (ता. ११) येथे पत्रकार परिषदेत सांगितले. पात्र ८० लाख शेतकऱ्यांना ऑक्‍टोबरअखेरपर्यंत कर्जमाफीची रक्कम त्यांच्या कर्ज खात्यावर जमा केली जाईल, अशी ग्वाही श्री. पाटील यांनी दिली.

पालकमंत्री पाटील म्हणाले, राज्यभरातून सुमारे ७२ लाख ऑनलाइन अर्ज राज्य शासनाकडे आले आहेत. या संदर्भात शासनाने काही समित्या नेमल्या आहेत. या समित्यांमार्फत स्कूटनी केली जाईल. राज्यभरात ८९ लाख शेतकरी कर्जमाफीसाठी अर्ज करतील, अशी अपेक्षा आहे. पण सुमारे दहा लाख अर्ज बनावट असल्याचा सरकारचा संशय आहे. त्यामुळे अशा बनावट शेतकऱ्यांनाच ऑनलाइन अर्ज भरताना अडचणी येत आहे.

दरम्यान उर्वरित ८० लाख शेतकरी मात्र कर्जमाफीचा लाभ घेण्यास पात्र आहेत. त्याची प्रक्रिया आता जलद सुरू आहे. यामध्ये काही अडचणी आल्या तर हे सरकार शेतकऱ्यांचेच आहे. त्यांच्यासाठी योग्यवेळी सवलतही दिली जाईल, असेही श्री. पाटील यांनी सांगितले.