बियाणे, विमा कंपनीविरुद्ध शेवगावला पोलिसांत फिर्याद

नगर ः ‘बीटी कापूस वाणाची लागवड केल्यास हे वाण कोणत्याही अळीला बळी पडत नाही अशी जाहीरात केली. त्यामुळे मी बीटी कापसाची लागवड केली. मात्र पिकांवर बोंड अळीचा प्रादुर्भाव झाल्याने माझे ८० टक्के नुकसान झाले आहे. त्यामुळे माझी फसवणूक झाली असून कापूस बियाणे कंपनी व विमा कंपनीवर फसवणुकीचा गुन्हा दाखल करावा, अशी तक्रार राहुल मालुसरे यांनी केली आहे. त्यांनी शेवगाव (जि. नगर) येथील पोलिस ठाण्यात फिर्याद दिली. 

कापसावर बोंड आळी पडल्याने नुकसान झाले, मात्र सरकार मदत देण्यात टाळाटाळ करत असल्याने मालुसरे यांनी न्यायालयात याचिका दाखल केली आहे. दोन दिवसांपूर्वी त्यांनी शेवगाव पोलिस ठाण्यात फिर्याद दिली आहे. ‘कापसाचे चांगले बियाणे असून त्याची लागवड केली तर  बोंड अळीसह कोणत्याही अळीचा प्रादुर्भाव होत नाही. शिवाय एकरी पंधरा ते वीस क्विंटल उत्पादन निघते अशी सतत जाहिरात केली. त्यामुळे मी या जाहिरातीवर विश्‍वास ठेवून तीस पाकिटे माझ्या शेतात लावले. मला एक एकर कापसाचे उत्पादन घेण्यासाठी मशागत, बियाणे, खते, मजुरी व विम्यासह पंचवीस हजारांच्या जवळपास खर्च आला. मात्र बोंड अळी पडल्याने ८० टक्के नुकसान झाले. 

याबाबत मी तालुका कृषी अधिकारी व तहसीलदारांना चार महिन्यांपूर्वी लेखी पत्र दिले आहे. मी सहा हेक्‍टर ३३ गुंठ्याचा पंतप्रधान पीक विमा घेतला होता. त्यापोटी साडेबारा हजार रुपयाचा हप्ताही भरला. मात्र विमा कंपनीकडूनही त्यांच्याकडूनही विमा मदत मिळाली नाही. 

माझी फसवणूक झाली असून विमा कंपनी व कापूस बियाणे कंपनी यांच्यावर गुन्हा दाखल करावा, अशी फिर्याद मालुसरे यांनी शेवगाव पोलिस ठाण्यात दिली आहे. फिर्याद देऊन तीन दिवसांचा कालावधी झाला तरी गुन्हा दाखल नाही. कोणत्या कलमाखाली गुन्हा दाखल करायचा हे पोलिस तपासात असल्याचे सांगण्यात आले.