वर्ष लोटूनही मिळाले नाही शेततळे अस्तरीकरणाचे अनुदान

जालना  : एकदा त्रुटी काढलेल्या प्रस्तावाची त्रुटी दूर केली. परंतु त्यांनतर जवळपास वर्ष लोटूनही शेततळ्यात केलेल्या अस्तरीकरणाचे अनुदानच मिळाले नसल्याची तक्रार अंबड तालुक्‍यातील टाका येथी महिला शेतकरी चंद्रकला सखाराम जायकर यांनी जिल्हा अधीक्षक कृषी अधिकाऱ्यांकडे केली आहे. या प्रकरणी न्याय न मिळल्यास १ एप्रिलपासून जिल्हा अधीक्षक कृषी अधिकारी कार्यालयासमोर उपोषणास बसण्याचा इशारा देण्यात आला आहे. 

यासंदर्भात प्राप्त माहितीनुसार जालना जिल्ह्यातील अंबड तालुक्‍यांतर्गत येत असलेल्या जायकर कुटूंबीयांकडे जवळपास साडेपाच एकर शेती आहे. या शेतीत त्यांच्याकडे दोन वर्षांपासून डाळिंब व जवळपास दहा वर्षापासून मोसंबीची फळबाग आहे. फळबागेसाठी त्यांनी पाणीटंचाईवर मात करण्यासाठी शेततळे घेतले. या शेततळ्यात अस्तरीकरणासाठी त्यांनी कृषी विभागाकडे अर्ज सादर केला. त्यानुसार त्यांना १३ जानेवारी २०१७ रोजी कार्यारंभ आदेश देण्यात आला.

जायकर यांनी अस्तरीकरण केले मात्र त्यांचा अर्ज त्रुटीत काढण्यात आला. जनधन खात्याची असलेली त्रुटी दूर करून त्यांनी जून २०१७ मध्ये प्रस्ताव कृषी विभागाकडे सादर केला. परंतु अजूनपर्यंत त्यांना अस्तरीकरणाचे अनुदान मिळाले नाही. आम्ही प्रस्ताव दिल्यापासून कृषी विभागाच्या कार्यालयाकडे बारा वेळा चकरा मारल्या; परंतु प्रस्ताव वरिष्ठांकडे पाठविला आहे, यापलीकडे कोणतेही उत्तर कृषी विभागाकडून देण्यात आले नसल्याची माहिती श्रीमती जायकर यांचा मुलगा सिद्धू जायकर यांनी दिली.

वारंवार विनंती करूनही दखल घेतल्या जात नसल्याने १९ मार्चला जिल्हा अधीक्षक कृषी अधिकाऱ्यांना निवेदन सादर केले. त्यानुसार येत्या ३१ मार्चपर्यंत अस्तरीकरणाचे अनुदान न मिळाल्यास १ एप्रिलपासून अधीक्षक कृषी अधिकारी कार्यालयासमोर उपोषणास बसण्याचा इशारा श्रीमती चंद्रकला जायकर यांनी दिला आहे.   

बैलजोडी विकून आम्ही शेततळ्याचे अस्तरीकरण केले. काढलेली त्रुटी दूर करून प्रस्ताव सादर केला. मात्र वर्ष लोटूनही त्यावर निर्णय न झाल्याने आता अनुदान न मिळाल्यास न्यायासाठी उपोषणाशिवाय पर्याय नाही.   - सिद्धू सखाराम जायकर, अर्जदार महिला शेतकऱ्याचा मुलगा, टाका ता. अंबड, जि. जालना.