शेतकऱ्यांच्या घरी जायला मुख्यमंत्र्यांना वेळ नाही : नाना पटोले

यवतमाळ : "जिल्ह्यात पुन्हा दुर्दैवी घटना घडली आहे. चार दिवसांपासून शेतकऱ्याचे शव शासकीय रुग्णालयात होते. मात्र, शासनाला याचे घेणेदेणे नसल्याचे दिसत आहे. जिल्ह्यात उमरखेड येथे येऊनही मुख्यमंत्री देवेंद्र फडणवीस यांना मृत शेतकऱ्याच्या कुटुंबीयांना भेटण्यासाठी वेळ नाही. मुख्यमंत्री येणार असल्याने काँग्रेस कार्यकर्त्यांना २४ तासांपासून नजरकैदेत ठेवले. आम्ही आता भाजपसाठी अतिरेकी झालो आहोत'', असे शरसंधान माजी खासदार नाना पटोले यांनी भाजपवर साधले.

येथील विश्राम भवनात आयोजित पत्रकार परिषदेत पटोले बोलत होते. या वेळी बाबासाहेब गाडे पाटील, महिला काँग्रेसच्या जिल्हाध्यक्ष माधुरी अराठे आदी उपस्थित होते. 

पटोले म्हणाले की, "शंकर चायरे या शेतकऱ्याने पंतप्रधानांचे नाव लिहून आत्महत्या केली. त्याची दखल प्रशासनाने घेतली तर नाहीच, मुख्यमंत्री तर दूरच; पालकमंत्र्यांनाही मृत शेतकरी कुटुंबातील सदस्यांची सांत्वनपर भेट घेण्यासाठी वेळ मिळाला नाही. मुख्यमंत्री देवेंद्र फडणवीस यांना प्रशासनाने घटनेची माहिती दिली. मुख्यमंत्र्यांनी या घटनेला पाठ दाखविण्यापेक्षा शेतकरी कुटुंबाची कैफियत जाणून घेणे आवश्‍यक होते. बोंड अळीच्या वेळेसही मुख्यमंत्री लपून छपून जिल्ह्यात आल्याचा आरोपही पटोले यांनी केला. 

शेतकरी आत्महत्या होत असतानाही सरकारला काळजी नाही. मुख्यमंत्री उमरखेडमध्ये येऊन जातात. मात्र, यवतमाळमध्ये येऊन मृत शेतकरी कुटुंबाची भेट घेण्यासाठी त्यांच्याकडे वेळ नसल्याचा आरोपही पटोले यांनी केला. मध्यस्थीसाठी बैठक

गेल्या चार दिवसांपासून शंकर चायरे यांचे शव शासकीय रुग्णालयात होते. शासकीय नोकरी व मदत देण्याची त्यांच्या कुटुंबीयांची मागणी होती. गुरुवारी (ता. १२) नाना पटोले यांच्या मध्यस्थीने शंकर चायरे यांची पत्नी व मुलगी, पालकमंत्री, प्रशासनाची बैठक जिल्हाधिकारी कार्यालयात झाली. मृत शेतकऱ्याच्या मुलीला खासगी कंपनीत सुपरवायझर पदावर तत्काळ नियुक्ती देणार असल्याचे पालकमंत्री मदन येरावार यांनी सांगितले.